දැවැන්ත දත්ත මධ්යස්ථාන සඳහා අවශ්ය වන අධික විදුලි පරිභෝජනය හේතුවෙන් සාමාන්ය වැසියන්ගේ විදුලි බිල්පත් ඉහළ යාම සහ පරිසරයට එල්ල වන බලපෑම් සැලකිල්ලට ගනිමින්, එවැනි මධ්යස්ථාන ඉදිකිරීම තාවකාලිකව අත්හිටුවීමට (Moratorium) මේන් ප්රාන්ත ව්යවස්ථාදායකය තීරණය කර තිබේ. ඇමෙරිකානු ප්රාන්තයක් මෙවැනි තහනමක් පැනවූ පළමු අවස්ථාව මෙය ලෙස වාර්තා වේ.
මෙම පනත මඟින් මෙගාවොට් 20කට වඩා වැඩි විදුලි බලයක් අවශ්ය වන දත්ත මධ්යස්ථාන සඳහා අනුමැතිය ලබාදීම 2027 ඔක්තෝබර් දක්වා අත්හිටුවනු ඇත. එම කාලය තුළ ප්රාන්තය විසින් පත් කරන ලද මණ්ඩලයක් මඟින් මෙම මධ්යස්ථාන දේශීය විදුලි පද්ධතියට, ජලයට, වාතයට සහ මහජනතාවගේ විදුලි බිල්පත්වලට බලපාන ආකාරය පිළිබඳව ගැඹුරු විශ්ලේෂණයක් සිදු කිරීමට නියමිතය. මෙම පනත ක්රියාත්මක වීම සඳහා මේන් ප්රාන්තයේ ඩිමොක්රටික් ආණ්ඩුකාර ජැනට් මිල්ස්ගේ (Janet Mills) අවසන් අනුමැතිය හිමිවිය යුතුව ඇත.
ගෝලීය වශයෙන් AI තාක්ෂණයේ වර්ධනයත් සමඟ Alphabet, Amazon සහ Meta වැනි සමාගම් සිය දත්ත මධ්යස්ථාන පුළුල් කරමින් සිටින පසුබිමක, මෙවැනි තීරණ එම සමාගම්වල ඉදිරි සැලසුම් කෙරෙහි බලපෑමක් ඇති කළ හැකි බව ආර්ථික විශ්ලේෂකයෝ පෙන්වා දෙති.
