රටක් ලෙස ආර්ථිකය ස්ථාවර කරමින් සිටින නමුත්, එය සරල හෝ පහසු රේඛීය මාර්ගයක ගමන් කරන්නේ නැති බවත්, පවතින ගෝලීය යුදමය තත්ත්වයන් මධ්යයේ වුවද සියලු බර ජනතාව මත නොපටවා ආර්ථිකය ස්ථාවර මට්ටමකට ගෙන ඒමට රජය කැපවී කටයුතු කරන බවත් සෞඛ්ය හා ජනමාධ්ය ඇමැති වෛද්ය නලින්ද ජයතිස්ස මහතා පවසයි.
ඇමැතිවරයා මේ බව සඳහන් කළේ කොළඹ ශ්රී ලංකා ජාතික රෝහලේදී පැවති පරිපාලන පවුල් සෞඛ්ය සේවා නිලධාරිනියන් 275 දෙනෙකුට සහතිකපත් ප්රදානය කිරීමේ උත්සවයට එක්වෙමිනි. මෙම නිලධාරිනියන් දිවයින පුරා පිහිටි පුහුණු මධ්යස්ථාන 11කදී තම පුහුණුව සාර්ථකව අවසන් කර තිබේ.
ලෝක සෞඛ්ය සංවිධානයේ සමුළුවේදී ශ්රී ලංකාවේ නිදහස් සෞඛ්ය සේවාව විශේෂ ඇගයීමකට ලක් වූ බව පෙන්වා දුන් ඇමැතිවරයා, එහි ගෞරවයෙන් විශාල කොටසක් පවුල් සෞඛ්ය සේවා නිලධාරිනියන් සතු බව පැවසීය. විශේෂයෙන්ම මාතෘ හා ළමා සෞඛ්ය සංවර්ධනය, බෝ නොවන රෝග පාලනය සහ ඉදිරියේදී ස්ථාපිත කරන ‘ආරෝග්යා’ සුවතා මධ්යස්ථාන හරහා ඔවුන්ට පැවරෙන වැඩ කොටස ඉහළ බව ඔහු අවධාරණය කළේය.
පවුල් සෞඛ්ය සේවා නිලධාරිනියන්ගේ වෘත්තීය ගැටලු සහ පහසුකම් පිළිබඳව අවධානය යොමු කළ ඇමැතිවරයා, ඔවුන් සඳහා යතුරුපැදි ලබා දීමටත්, ලබන ජනවාරි මාසයේ සිට වැටුප් වැඩිවීමක් ලබා දීමටත් කටයුතු කරන බවට මෙහිදී පොරොන්දු විය.
මෙම උත්සවය සඳහා සෞඛ්ය හා ජනමාධ්ය අමාත්යාංශයේ ලේකම් විශේෂඥ වෛද්ය අනිල් ජාසිංහ මහතා ඇතුළු අමාත්යාංශයේ ඉහළ නිලධාරීන් සහ වෘත්තීය සමිති නියෝජිතයන් රැසක් සහභාගි වූහ.
