පිලිපීනයට රික්ටර් මාපකයේ 7.4ක ප්‍රබලත්වයකින් යුත් භූමිකම්පාවක් අද (10) පෙරවරුවේ හට ගෙන තිබෙනවා.
පිලිපීනයේ මින්ඩනාඕ කලාපයේ යි මෙම භූමිකම්පාව ඇති වී තිබෙන්නේ.
ඒ හේතුවෙන් පිලිපීනයට මෙන්ම අසල්වැසි ඉන්දුනීසියාවටද සුනාමි අනතුරු ඇඟවීම් නිකුත් කර තිබෙනවා.
කෙසේ වෙතත් පිලිපීනයේ සමහර ප්‍රදේශවල සුනාමි රළ සාමාන්‍ය වඩදිය මට්ටමට වඩා මීටර් 3 (අඩි 10) දක්වා ඉහළ යා හැකි බවත් පළමු සුනාමි රළ පිලිපීන වේලාවෙන් රාත්‍රී 11:43ට පෙර පැමිණිය හැකි බවත්, පැය ගණනක් එය පැවතිය හැකි බවත් පිලිපීන බලධාරීන් පවසනවා.
මේ අතර ඉන්දුනීසියාවේ සහ පලාවු ප්‍රදේශවල මුහුදු රළ ද මීටර් 1 ක් දක්වා ඉහළ යා හැකි බව පැසිෆික් සුනාමි අනතුරු ඇඟවීමේ මධ්‍යස්ථානය විසින් පවසා තිබෙනවා.
සිදුවූ භූකම්පාවෙන් පුද්ගලයින් දෙදෙනෙකු මිය ගොස් ඇති බව වාර්තා වනවා. ප්‍රබල භූමිකම්පාවෙන් පසු පාසල් කිහිපයක සහ රෝහලක ගොඩනැගිලිවලට හානි සිදුවී ඇති අතර සුනාමි අනතුරු ඇඟවීම හේතුවෙන් අවට වෙරළබඩ ප්‍රදේශවලින් ඉවත් වීමට ද දන්වා තිබෙනවා.
*Updates
කෙසේ වෙතත් මේ වන විට සුනාමි තර්ජනය පහව ගොස් ඇති බවයි එරට මාධ්‍ය වාර්තා සදහන් කර සිටින්නේ.
පසුගිය සතියේත් පිලිපීනයේ සෙබු පළාතේ රික්ටර් මාපකයේ 6.9 ක භූමිකම්පාවක් ඇති වූ අතර එයින් අවම වශයෙන් පුද්ගලයින් 74 දෙනෙකු මිය ගොස් බොහෝ දෙනෙකු තුවාල වී තිබෙනවා.
මෙම ප්‍රබල භූමිකම්පාවෙන් බන්ටායාන්හි සියවස් ගණනාවක් පැරණි ශාන්ත පීතර අපොස්තුළු දේවස්ථානය ද විනාශ වූ අතර, එය කම්පනවල බලපෑම හේතුවෙන් බිඳ වැටී ඇති බව එරට මාධ්‍ය පවසනවා.
