රටේ ආර්ථික තත්ත්වය ජනතාවට හෙලි කරන්නැයි හිටපු අගමැති රනිල් කියයි

රටේ වර්තමාන මූල්‍ය සහ මුදල් තත්ත්වය පිළිබඳව සවිස්තර වාර්තාවක් ඉදිරිපත් කිරීම රජයේ වගකීමක් වන අතර රටේ ආර්ථික තත්ත්වය පිළිබඳ සැබෑ තොරතුරු ජනතාව හමුවේ හෙළිදරව් කරන ලෙස ආණ්ඩුවෙන් ඉල්ලා සිටින බව එක්සත් ජාතික පක්ෂ නායක සහ හිටපු අග්‍රාමාත්‍ය රනිල් වික්‍රමසිංහ මහතා පවසයි.

ඒ මහතා සමාජ මාධ්‍යජාල හමුවේ කළ විශේෂ ප්‍රකාශයක් නිකුත් කරමින් සඳහන් කර සිටියේ පවතින තත්ත්වය තුළ නිශ්ශබ්දව සිටීමෙන් මේ කිසිදු අනතුරුදායක තත්ත්වයකින් ගොඩ ඒමේ මාර්ගයක් සෑදෙන්නේ නැති බවයි.

එක්සත් ජාතික පක්ෂ නායක සහ හිටපු අග්‍රාමාත්‍ය රනිල් වික්‍රමසිංහ මහතා සමාජ මාධ්‍යජාල හමුවේ කළ විශේෂ ප්‍රකාශය සම්පුර්ණයෙන් පහත පරිදි වේ.

මාළිඟාවත්තේ ජීවිත තුනක් අහිමි වීමේ සිද්ධියෙන් අද ශ්‍රී ලංකාවේ ජනතාව පත්ව සිටින ආර්ථික අහේනියේ තත්ත්වය පෙන්නුම් කරනවා. හැම අවුරුද්දකම ඔය ආකාරයට සල්ලි බෙදුවා. ඒත් පාලනය කරගන්න බැරි තරම් සෙනගක් ආවේ නෑ. රුපියල් එක්දාස් පන්සීයකට ජීවිතේ පරදුවට තියන්න තරම් ජනතාව අසරණ වුනේ නෑ.

අද ජනතාවට ජීවත් වෙන්න අමාරුයි. සල්ලි නෑ. රැකියා නෑ. ආදායම් මාර්ග නෑ. දවසින් දවස බඩු ගනන් යනවා. රුපියල් 5,000 දීමනාවවත් ගෙවා ගන්න බැරි තත්ත්වයට ආණ්ඩුව පත් වෙලා. රජයේ සේවකයන්ට උත්සව අත්තිකාරම් ගෙවීමටත් නොහැකි වුණා. මේ සියල්ලෙන් පැහැදිලි වෙන්නේ අද අපේ රටේ ආර්ථිකය පත්වී ඇති බැරෑරුම් තත්ත්වයයි.

මේ අවුරුද්දේ ණය ගෙවාගන්න බැරි රටවල් කීපයක් පසුගියදා සී. එන්. එන්. රූපවාහිනී සේවාව නම් කළා. ආර්ජන්ටීනාව, ඉක්වදෝරය සහ ලෙබනනය ඒ රටවල්. ඒ රටවල් ඉතාම අනතුරුදායක තත්තවයකට ඇද වැටිලා

ණය ගෙවීමට බැරිවී බංකොලොත් වෙන ඊළඟ රටවල් පහ අතරට ශ්‍රී ලංකාවත් අයත් විය හැකි බවට ලෝක මූල්‍ය දර්ශක පුරෝකථනය කරනවා.

මේ අනුව අපේ රට පවතින්නේ ඉතාම අනතුරුදායක තත්ත්වයක. ෆිච් දර්ශකය ගිය මාසයේ දී ශ්‍රී ලංකාව සෘණ තත්ත්වයට පහත දමා තිබෙනවා. මූඩීස් සහ මොර්ගන් ස්ටැන්ලි දර්ශක ශ්‍රී ලංකාව පහත දැමීම ගැන සලකා බලමින් යනවා. 2018 වසරේ මේ දර්ශක තුනේම ස්ථාවර තත්ත්වයක් ලබා ගෙන සිටි අප අද අස්ථාවර තත්ත්වයකට ඇද වැටී තියෙනවා.

2019 වසරේ අප ගෙවිය යුතු ණය දළ දේශීත නිෂ්පාදනයෙන් සියයට 87 ක් වේ. මේ වසර අගදී එය සියයට 93 ක් පමණ වෙතැයි බලාපොරොත්තු වෙනවා. 2021 වෙද්දී සියයට සියයක් වෙනවා.

2023 වෙද්දී අප ගෙවිය යුතු ණය ප්‍රමාණය ඇමෙරිකානු ඩොලර් බිලියන 10 ක්. මේ වසරේ පමණක් ඩොලර් බිලියන 03 ක් ගෙවන්නට තියෙනවා. මේ අවුරුද්දේ ඔක්තෝබර් මාසයේ එක් දිනයක් තුළ දී පමණක් ඩොලර් බිලියනයක් ගෙවිය යුතු වෙනවා.

ලෝක ආර්ථික තත්ත්වයන් අනුව ඇඟලුම් හා සංචාරක කර්මාන්තයන්ගෙන් ආදායම් ලැබීමට තව බොහෝ කල් ගත වෙනවා. කෙටි කාලීනව විදේශ ආදායම් ලබා ගත හැකි මාර්ග අප සොයා ගත යුතුව තියෙනවා. රටේ ජනතාවට, ව්‍යාපාරික හා නිෂ්පාදන ආයතනයන්ට සහන ලබා දී ආරක්ෂා කර ගත යුතුව තියෙනවා. බංකොලොත් නොවී රට ඉදිරියට ගෙන යා යුතුව තියෙනවා.

මූල්‍ය කළමණාකරණ වගකීම් පණත අනුව රටේ ආර්ථික සැලසුම් හා මූල්‍ය කටයුතු පිළිබඳ වාර්තා ආණ්ඩුව විසින් කාලානුරූපව ඉදිරිපත් කළ යුතුයි. නමුත් එය සිදුවී නෑ. අවසන් වරට ආණ්ඩුව වාර්තාවක් ඉදිරිපත් කළේ මාර්තු 23 වෙනිදා. ඒ පූර්ණ මැතිවරණ අයවැය තත්ත්වය පිළිබඳ වාර්තාවයි. නමුත් මේ වන විට මාර්තු මාසයේ තිබුණු ආර්ථික සාධක හා මූල්‍ය තත්ත්වය සම්පූර්ණයෙන්ම වෙනස් වෙලා. ඒ නිසා මේ වාර්තාව දැන් යල් පැන ගිය එකක් බවට පත්වී තියෙනවා.

මාලදිවයිනේ පාර්ලිමේන්තුව මෙහිදී අපට උදාහරණයට ගන්න පුළුවන්. ඔවුන් පසුගිය අප්‍රේල් මාසයේ නව යෝජනා සම්මත කර ගත්තා. අප තවමත් ඊට අසමත් වී තියෙනවා.

මේ පසුබිම මත රටේ වර්තමාන මූල්‍ය සහ මුදල් තත්ත්වය පිළිබඳව සවිස්තර වාර්තාවක් ඉදිරිපත් කිරීම රජයේ වගකීමක් වෙනවා. ඒ වාර්තාව පදනම් කරගෙන නව ආර්ථික රාමුවක් සකස් කර ගත යුතුයි.

මෙය ගණන් ඉලක්කම් පිළිබඳ ප්‍රශ්ණයක් නෙවෙයි. රටේත් ජනතාවගේත් අනාගතය පිළිබඳ ප්‍රශ්නයක්. ජීවත්වීම සහ ජීවිතය පිළිබඳ ප්‍රශ්ණයක්. ඒ නිසා අප ආණ්ඩුවෙන් ඉල්ලා සිටින්නේ රටේ ආර්ථික තත්ත්වය පිළිබඳ සැබෑ තොරතුරු ජනතාව හමුවේ හෙළිදරව් කරන ලෙසයි.

එසේ නොකර නිශ්ශබ්දව සිටීමෙන් මේ කිසිදු අනතුරුදායක තත්ත්වයකින් ගොඩ ඒමේ මාර්ගයක් සෑදෙන්නේ නෑ.

Pin It

සබැඳි පුවත්

ඩෙල්ටා රට පුරා .. මරණ සංඛ්‍යාව ඉහළට - උපුල් රෝහණ
ඩෙල්ටා රට පුරා .. මරණ සංඛ්‍යාව ඉහළට - උපුල් රෝහණ ඩෙල්ටා ප්‍රභේදය ආසාදනය වුවන් රටපුරා පැතිර සිටින බව බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා පවසයි. ඒ මහතා පැවසුවේ වාර්තා වන රෝග...
රටට වැඩ කරන්න මට තනතුරු ඕන නෑ - උදයංග වීරතුංග
රටට වැඩ කරන්න මට තනතුරු ඕන නෑ - උදයංග වීරතුංග මෙරට සංචාරක කේෂ්ත්‍රය නගා සිටුවීමට රටේ ආර්ථික දියුණු කිරීමට තනතුරු අවශ්‍ය නොමැති බව රුසියාවේ හිටපු තානාපති උදයංග වීරතුංග මහතා පවසයි. අද (27) රජයේ ප්‍රවෘත්ති ...
පවුල් සෞඛ්‍ය සේවා නිලධාරී තනතුර සදහා අභ්‍යාසලාභීන් බඳවා ගැනීමේ සම්මුඛ පරීක්ෂණ
පවුල් සෞඛ්‍ය සේවා නිලධාරී තනතුර සදහා අභ්‍යාසලාභීන් බඳවා ගැනීමේ සම්මුඛ පරීක්ෂණ අතුරු වෛද්‍ය සේවාවේ පවුල් සෞඛ්‍ය සේවා නිලධාරී තනතුර සදහා අභ්‍යාසලාභීන් බඳවා ගැනීමේ සම්මුඛ පරීක්ෂණ 31 සහ 01 වනදා යන දිනයන් හී දී උතුරු පළාත් අයදුම්කරුවන් සඳ...
කොරෝනා ආසාදිතයින් වැඩි දෙනෙකුට ඔක්සිජන් ඕනෑ - වෛද්‍ය හේමන්ත කියයි
කොරෝනා ආසාදිතයින් වැඩි දෙනෙකුට ඔක්සිජන් ඕනෑ - වෛද්‍ය හේමන්ත කියයි මේ දිනවල හදුනාගත් කොරෝනා ආසාදිතයින් වැඩි දෙනෙකුට රෝග ලක්ෂණ වැඩි වන අතරම ඔක්සිජන් අවශ්‍යතාවය වැඩි බව නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන...
මේ උද්ඝෝෂණය කරන වේලාවක් නෙමෙයි.. මුලින්ම කොරෝනා පාලනය කරමු - රාජ්‍ය ඇමැති චන්න
මේ උද්ඝෝෂණය කරන වේලාවක් නෙමෙයි.. මුලින්ම කොරෝනා පාලනය කරමු - රාජ්‍ය ඇමැති චන්න පවතින කොරෝනා වසංගතය පාලනය කිරීමට කටයුතු කිරීමට සියළු දෙනා එක්විය යුතු බව රාජ්‍ය අමාත්‍ය චන්න ජයසුමන මහතා පවසයි. ඒ මහතා මේ බව පැවසුවේ සයිනොෆාම් එන්නත් මාත්‍රා...
කාබනික කෘෂිකර්මාන්තයක් සඳහා ශ්‍රී ලංකාව මෙන්ම වෙනත් රටවල්ද පෙළඹෙනු ඇති බව අපේක්ෂා කරනවා - ජනපති
කාබනික කෘෂිකර්මාන්තයක් සඳහා ශ්‍රී ලංකාව මෙන්ම වෙනත් රටවල්ද පෙළඹෙනු ඇති බව අපේක්ෂා කරනවා - ජනපති අනාගත පරපුරේ ආහාර සුරක්ෂිතතාව සහ පෝෂණය සහතික කිරීම උදෙසා කාබනික කෘෂිකර්මාන්තයක් සඳහා වූ ශ්‍රී ලංකාවේ ප්‍රවේශයට, තවත් රටවල් පෙළඹෙනු ඇති බව තමා අපේක්ෂා කරන බව ජනා...

Print   Email