ඉරානය පුරා පැවැති දැවැන්ත රාජ්ය විරෝධී උද්ඝෝෂණ මාලාවේදී පුරවැසියන් දහස් ගණනකට ජීවිත අහිමි වීම සම්බන්ධයෙන් විමර්ශනය කිරීම සඳහා විශේෂ කොමිසමක් පිහිටුවීමට ඉරාන රජය තීරණය කර තිබේ. දරාගත නොහැකි ලෙස ජීවන වියදම ඉහළ යාමට එරෙහිව ආරම්භ වූ මෙම විරෝධතා පසුව රජයට එරෙහි ප්රචණ්ඩකාරී ස්වරූපයක් ගත් අතර, එහිදී ආරක්ෂක අංශ සහ විරෝධතාකරුවන් අතර ඇති වූ ගැටුම්වලින් විශාල පිරිසක් මිය ගියහ.
කෙසේ වෙතත්, මෙම පරීක්ෂණ කොමිසම මඟින් විමර්ශනය කරනු ලබන්නේ විරෝධතාවලට මුල් වූ ආර්ථික පසුබිම පමණක් ද, නැතහොත් සිදුවූ මරණ පිළිබඳව ද යන්න මෙතෙක් පැහැදිලි කර නොමැත. විදෙස් මාධ්ය වාර්තා කරන්නේ ඉරාන බලධාරීන් මෙම කොමිසම හරහා ජාත්යන්තරයට සහ ජනතාවට පිළිගත හැකි විනිවිදභාවයකින් යුතු වාර්තාවක් ඉදිරිපත් කරන්නේද යන්න පිළිබඳව මානව හිමිකම් සංවිධාන දැඩි අවධානයෙන් පසුවන බවයි.
