දෙහිවල ජාතික සත්වෝද්යානයෙන් අතුරුදන්ව සිටි බවට වාර්තා වූ ‘කහ ඇනකොණ්ඩා’ (Yellow Anaconda) පැටවා නැවත සොයාගෙන තිබෙනවා.
අඩි 1 1/2 ත් 2 ත් පමණ දිගැති, අවුරුද්දක් පමණ වයසැති මෙම කහ ඇනකොණ්ඩා පැටවා,පසුගිය දෙසැම්බර් මස 7 වන දින අතුරුදන් වී ඇති බවට දෙහිවල පොලිසියට පැමිණිලි කර තිබුණා.
මෙම පැටවා සත්වෝද්යානය සතුව සිටි ලංකාවේ එකම කහ ඇනකොණ්ඩා ලෙස සැලකේ.
මෙම සර්පයා, නීතිවිරෝධී ලෙස මෙරටට රැගෙන ආ සර්ප විශේෂ 4කට අයත් සර්පයන් 6 දෙනෙකු අතර සිටි අයෙක්. මෙම සතුන් 2025 සැප්තැම්බර් 15 වන දින කටුනායක ගුවන්තොටුපළ නිලධාරීන් විසින් අත්අඩංගුවට ගෙන රැකබලා ගැනීම සඳහා සත්වෝද්යානයට භාර දී උරග උයන තුළ නිරෝධායනය කරමින් සිටියදීයි මෙලෙස අතුරුදන් වී තිබෙන්නේ.
සත්ව භාරකරු ප්රකාශ කර තිබුණේ අතපසුවීමකින් පැටවා රඳවා සිටි පෙට්ටියේ දොර වසා නොතිබීම හේතුවෙන් එම සත්වයා පිටතට ගොස් ඇති බවයි.
සිද්ධියෙන් පසු දින කිහිපයක් පුරා සත්වෝද්යානය තුළ දැඩි සෝදිසි මෙහෙයුම් සිදුකර ඇතත් සත්වයා සොයා ගැනීමට නොහැකි වි තිබුණා. පසුව, මූලික පරීක්ෂණවලින් අනතුරුව ඊයේ දෙසැම්බර් 16) දින උරගයින් භාරව සිටි සත්ව භාරකරුගේ වැඩ තහනම් කිරීමට බලධාරීන් කටයුතු කර තිබුණා.
සත්ව භාරකරුගේ වැඩ තහනමට ලක් කර පැය 24ක් ගතවීමට මත්තෙන්, උරග උයන තුළම තිබූ යකඩ පෙට්ටියක සිටියදී මෙම කහ ඇනකොණ්ඩා පැටවා සොයා ගැනීමට හැකි වුණා.
