සීමාසහිත Adani Green Energy සමාගමේ සුළං බල ව්‍යාපෘතිය සඳහා වන පාරිසරික බලපෑම් තක්සේරුව පිළිබඳ අවසන් වාර්තා කඩිනමින් ලබාදෙන බවට මධ්‍යම පරිසර අධිකාරිය සහතික වී තිබේ.

මන්නාරම සහ පුනරීන් හි Adani Green Energy Limited හි සුළං බලාගාර ව්‍යාපෘති සම්බන්ධයෙන් වන පාරිසරික බලපෑම් තක්සේරු කිරීමේ ක්‍රියාවලිය අවසන් කිරීම ප්‍රමාද වීම පිළිබඳ පරිසරවේදීන් විසින් විවිධ චෝදනා ද මතුකර තිබිණි.

ඉන්දියාවේ Adani Green Energy Limited සමාගමට මන්නාරම සහ පුනරීන් හි සුළං බලාගාර දෙකක් ඉදිකිරීම සඳහා එක්සත් ජනපද ඩොලර් මිලියන 442ක ව්‍යාපෘතියක් මෙම වසර මුලදී ආයෝජන මණ්ඩලය විසින් අනුමත කරන ලදී.

මන්නාරම ව්‍යාපෘතිය මෙගාවොට් 250ක ධාරිතාවකින් යුක්ත වීමට නියමිතය.

කෙසේවෙතත්, පාරිසරික බලපෑම් තක්සේරුවේ සොයාගැනීම් මත පදනම්ව සංක්‍රමණික පක්ෂීන්ට ඇති විය හැකි බලපෑම පිළිබඳ පරිසරවේදීන් බරපතළ කණස්සල්ලක් මතුකර තිබිණි.

මෙම පාරිසරික ගැටලු විසඳීමට කඩිනම් පියවර ගන්නා ලෙස ඔවුන් ශ්‍රී ලංකා රජයෙන් ඉල්ලා තිබිණි.

මධ්‍යම පරිසර අධිකාරියේ සභාපති වෙනුර ප්‍රනාන්දු ප්‍රකාශ කර ඇත්තේ මේ වන විට වාර්තාවේ තාක්ෂණික ඇගයීම් කටයුතු සිදු කරමින් පවතින බවත්, ඉන් අනතුරුව මධ්‍යම පරිසර අධිකාරිය එහි අවසන් තීරණය ලබා දෙන බවත්ය.

මහජන අදහස් විමසීමේ සැසිවාරය අවසන් කර ඇති නමුත් පක්ෂීන්ගේ සංචරණ සම්බන්ධයෙන් විශේෂඥයන් විසින් මතු කරන ලද ඇතැම් කරුණු තවදුරටත් පැහැදිලි කළ යුතු බව ඔහු වැඩිදුරටත් පවසා තිබේ.

අදානි සමාගමේ ව්‍යාපෘති ශ්‍රී ලංකාවේ පුනර්ජනනීය බලශක්ති ක්ෂේත්‍රයේ සැළකිව යුතු ආයෝජනයක් නියෝජනය කරන අතර එමගින් රටේ බලශක්ති සම්බන්ධ අවශ්‍යතා සඳහා සැළකිව යුතු දායකත්වයක් ලබා දීමට හැකියාව ඇත.

කෙසේවෙතත්, පරිසරවේදීන් විසින් මතු කරන ලද කරුණු රටේ ස්වාභාවික උරුමයන් සුරක්ෂිත කිරීම සඳහා දැඩි පාරිසරික ඇගයීම් පැවැත්වීමේ වැදගත්කම අවධාරණය කර තිබේ.