අදානි වරාය සහ විශේෂ ආර්ථික කලාපයට (Adani Ports and SEZ Ltd) අයත් මුන්ඩ්රා (Mundra) ප්රදේශයේ හෙක්ටයාර 108ක තණබිම් (Grazing land) නැවත රජයට පවරා ගැනීමට ගුජරාට් රජය නිකුත් කළ නියෝගය ඉන්දීය ශ්රේෂ්ඨාධිකරණය විසින් අවලංගු කර තිබේ. ස්වභාවික යුක්ති ධර්මයේ මූලධර්ම උල්ලංඝනය කරමින් මෙම තීරණය ගෙන ඇති බව අධිකරණයේ මතයයි.
මෙම මතභේදය 2011 වසරේදී ගොනු කළ මහජන සුබසාධන පෙත්සමක් (PIL) දක්වා දිවයයි. එහිදී කුච් (Kutch) දිස්ත්රික්කයේ නාවිනාල් (Navinal) ගම්මානයට අයත් සත්ව තණබිම් පෞද්ගලික සමාගම් වෙත විකිණීම සහ වෙන් කිරීම අභියෝගයට ලක් විය. ගුජරාට් රජය විසින් 2024 ජූලි 4 වැනිදා අදාළ ඉඩම් නැවත පවරා ගැනීමට නියෝගයක් නිකුත් කළද, එම තීරණය ගැනීමට පෙර අදාළ පාර්ශවයට (අදානි සමාගමට) ඇහුම්කන් දීමේ අවස්ථාවක් ලබා දී නොමැති බව අධිකරණය පෙන්වා දුන්නේය.
විනිසුරු ජේ.කේ. මහේෂ්වරි සහ අතුල් චන්ද්රකර් යන මහත්වරුන්ගෙන් සැදුම්ලත් විනිසුරු මඩුල්ල තීන්දු කළේ, බලපෑමට ලක් වූ පාර්ශවයට කරුණු ඉදිරිපත් කිරීමට අවස්ථාවක් ලබා නොදීම නිසා රජයේ නියෝගය මෙන්ම එය ක්රියාත්මක කිරීමට ගුජරාට් මහාධිකරණය දුන් නියෝග ද නීත්යානුකූල නොවන බවයි. ඒ අනුව රජයට අවශ්ය නම් නැවතත් නිසි ක්රමවේදය අනුගමනය කරමින් නව නියෝගයක් නිකුත් කිරීමට අධිකරණය අවසර ලබා දී තිබේ.
මෙම නඩුවේදී අදානි සමාගම වෙනුවෙන් ජ්යෙෂ්ඨ නීතිඥ මුකුල් රොහාට්ගි පෙනී සිටි අතර, ගුජරාට් රජය වෙනුවෙන් සොලිසිටර් ජනරාල් තුෂාර් මේතා කරුණු ඉදිරිපත් කළේය. මුන්ඩ්රා වරාය ව්යාපෘතිය සඳහා හෙක්ටයාර 231ක පමණ තණබිම් වෙන් කිරීම හේතුවෙන් ප්රදේශයේ ගම් පංචායතනයට සහ සතුන් ඇති කරන්නන්ට දැඩි බලපෑම් එල්ල වී ඇති බව පෙත්සම්කරුවන්ගේ ප්රධාන තර්කය වී තිබේ.
