අබුඩාබි කාන්තාරයේ පිහිටි අල් ඛතම් (Al Khatm) තාරකා විද්යා නිරීක්ෂණාගාරය විසින් අභ්යවකාශයේ ඇති අතිවිශාල වායු සහ දූවිලි වලාකුළක් වන ‘ජෙලිෆිෂ් නෙබියුලා’ (IC 443) හි අතිශය පැහැදිලි ඡායාරූපයක් ලබා ගැනීමට සමත්ව තිබේ. මිථුන (Gemini) තාරකා රාශිය තුළ පිහිටා ඇති මෙම නෙබියුලාව, එහි ඇති සුවිශේෂී හැඩය නිසා ජෙලිෆිෂ් මත්ස්යයෙකුගේ නමින් හඳුන්වනු ලබයි.
පෘථිවියේ සිට ආලෝක වර්ෂ 5,000ක් පමණ ඈතින් පිහිටි මෙය, මීට වසර 30,000කට පමණ පෙර මහා තාරකාවක් පුපුරා යාමෙන් (Supernova) ඉතිරි වූ සුන්බුන්වලින් සමන්විත වුවකි. විද්යාඥයන් පෙන්වා දෙන්නේ එම පිපිරීමෙන් පසු ඉතිරි වූ තාරකාවේ හරය මේ වන විට ‘නියුට්රෝන තරුවක්’ ලෙස පැයට කිලෝමීටර් 830,000ක පමණ වේගයෙන් අභ්යවකාශය හරහා ගමන් කරමින් පවතින බවයි.
පසුගිය පෙබරවාරි 8 වනදා සිට 22 වනදා දක්වා සති දෙකක පමණ කාලයක් තිස්සේ, කාලගුණික තත්ත්වයන් සහ සඳෙහි පිහිටීම සැලකිල්ලට ගනිමින් රාත්රී කාලයේදී සිදු කරන ලද නිරීක්ෂණ මඟින් මෙම අපූර්ව දර්ශනය පටිගත කර ගැනීමට තාරකා විද්යාඥයින්ට හැකි වී තිබේ. අපට මෙම ඡායාරූපයෙන් පෙනෙන්නේ ක්රිස්තු පූර්ව 3000 තරම් ඈත අතීතයකදී එම නෙබියුලාවෙන් පිටවූ ආලෝකයයි.
