ඉරාන යුද උණුසුම හමුවේ ඇමරිකා එක්සත් ජනපදය විසින් පනවා ඇති ඉන්ධන අවහිරතා හේතුවෙන් දැඩි බලශක්ති අර්බුදයකට මුහුණ දී සිටින කියුබාවට සහාය වීම සඳහා රුසියාව සිය දෙවන තෙල් නැව එරටට එවීමට සූදානම් වන බව රුසියානු බලශක්ති අමාත්ය සර්ජි සිවිලියෙව් (Sergei Tsivilev) ඊයේ (02) ප්රකාශ කළේය. කියුබාවේ ප්රධාන ඉන්ධන සැපයුම්කරු වූ වෙනිසියුලානු ජනාධිපති නිකොලස් මදුරෝ ඇමරිකානු හමුදා භාරයට පත්වීමෙන් පසු ජනවාරි මාසයේ සිට කියුබාව මෙම අර්බුදයට මුහුණ දී සිටී.
වොෂින්ටනය විසින් කියුබාවට ඉන්ධන සපයන ඕනෑම රටකට එරෙහිව බදු පැනවීමට තර්ජනය කර ඇති අතර, මානුෂීය හේතූන් මත පසුගිය සතියේ එක් රුසියානු තෙල් නැවකට පමණක් කියුබාවට ඇතුළු වීමට අවසර ලබා දී තිබුණි. “රුසියානු සමූහාණ්ඩුවේ එක් නෞකාවක් අවහිරතා බිඳ දමමින් කියුබාවට ළඟා වුණා. දැන් දෙවන නෞකාවට තෙල් පටවමින් පවතිනවා. අප කියුබානු මිතුරන් අමාරුවේ දමන්නේ නැහැ,” යනුවෙන් රුසියානු අමාත්යවරයා රජයේ මාධ්ය වෙත පවසා තිබේ.
සාන්ත පීටර්ස්බර්ග්හි නිල සංචාරයක නිරත වන කියුබානු නියෝජ්ය අග්රාමාත්ය ඔස්කාර් පෙරේස්-ඔලිවා (Oscar Perez-Oliva) රුසියානු RT පුවත් සේවයට ප්රකාශ කළේ, ඇමරිකාවේ “කුරිරු බලශක්ති අවහිරතා” මධ්යයේ ඉන්ධන සැපයුමේ ස්ථාවරත්වයක් ඇති කර ගැනීම සඳහා හවානා සහ මොස්කව් නුවර ඒකාබද්ධව කටයුතු කරන බවයි. කියුබාව පුරා පවතින දැඩි විදුලි කප්පාදුව සහ ප්රවාහන දුෂ්කරතා මධ්යයේ මෙම රුසියානු ඉන්ධන සැපයුම එරටට විශාල සහනයක් වනු ඇතැයි අපේක්ෂා කෙරේ.
