ගාල්ල වෙරළට නාවික සැතපුම් 19ක් පමණ ඔබ්බෙන් වූ ඉන්දියන් සාගරයේදී ඉරානයට අයත් IRIS Dena යුධ නෞකාව අමෙරිකානු න්යෂ්ටික සබ්මැරීනයක් විසින් එල්ල කළ ටොපිඩෝ ප්රහාරයකින් ගිල්වා දැමීම ජාත්යන්තර දේශපාලන සහ යුධ විශ්ලේෂකයන්ගේ දැඩි කතාබහට ලක්ව තිබේ. පසුගිය මාර්තු 4 වනදා අලුයම සිදු වූ මෙම ප්රහාරයෙන් නෞකාවේ සිටි 84 දෙනෙකු ජීවිතක්ෂයට පත් වූ අතර, එය ඉන්දියාව සහ ඇමරිකාව අතර පවතින ආරක්ෂක සබඳතාවලට එල්ල වූ “අපහාසයක්” ලෙස ආරක්ෂක විශේෂඥයෝ හඳුන්වති.
මෙම නෞකාව ඉන්දියාවේ විශාඛාපට්නම් හි පැවැති ජාත්යන්තර නාවික සංදර්ශනයකට සහභාගී වී ආපසු එමින් සිටියදී මෙලෙස ප්රහාරයට ලක් විය. ඉන්දියාවේ ආරාධනයෙන් පැමිණි අමුත්තෙකු වූ මෙම නෞකාවට ඉන්දියාවේ “දොරකඩදීම” ප්රහාර එල්ල කිරීම සම්බන්ධයෙන් ඉන්දීය හිටපු නාවික හමුදාපතිවරුන් සිය විස්මය සහ කනගාටුව පළ කර ඇත. ඇමරිකානු ආරක්ෂක ලේකම් පීට් හෙග්සෙත් මෙම ප්රහාරය සාධාරණීකරණය කරමින් පවසා ඇත්තේ ඉරාන නෞකාව “නිහඬ මරණයක්” අත්කර ගත් බවයි.
නෞකාව ගිලීමට පෙර ශ්රී ලංකාවට ඇතුළු වීමට අවසර ඉල්ලා තිබුණද, ශ්රී ලංකා රජය එම අවසරය ලබා දීමට පැය 11 කට වඩා ප්රමාද වීම නිසා නෞකාව ඇමරිකානු ප්රහාරයට පහසු ඉලක්කයක් වූ බව හිටපු නාවික හමුදා මාණ්ඩලික ප්රධානී රියර් අද්මිරාල් සරත් වීරසේකර මහතා පවසයි. මෙම සිදුවීම හරහා ඉන්දියන් සාගරයේ ආරක්ෂාව තහවුරු කිරීමට ඉන්දියාවට ඇති හැකියාව පිළිබඳව ද ප්රශ්න මතු වී ඇති අතර, ඇමරිකානු සබ්මැරීනයක් තම බල ප්රදේශයට මෙතරම් සමීප වන තෙක් ඉන්දියාව හෝ ශ්රී ලංකාව ඒ පිළිබඳව දැනුවත් නොවීම ද බරපතළ ආරක්ෂක දුර්වලතාවයක් ලෙස පෙන්වා දී තිබේ.
