කෘෂිකාර්මික නිෂ්පාදන, ඖෂධ සහ මත්පැන් ඇතුළු භාණ්ඩ රැසක් සඳහා ඉන්දියාව පනවා ඇති ඉහළ ආනයන බදු (Import Duties) සහ අනෙකුත් වෙළඳ බාධක හේතුවෙන් අමෙරිකානු අපනයනකරුවන් දැඩි දුෂ්කරතාවයට පත්ව ඇති බව අමෙරිකානු වෙළඳ නියෝජිත (USTR) කාර්යාලය නිකුත් කළ 2026 වාර්තාවක සඳහන් වේ. ඊයේ (මාර්තු 31) නිකුත් කළ මෙම වාර්තාව මගින් ඉන්දියාවේ වෙළඳ ප්රතිපත්තිවල පවතින අවිනිශ්චිතතාවය විවේචනයට ලක් කර ඇත.
ඉන්දියාව ඇතැම් භාණ්ඩ සඳහා පනවා ඇති බදු ප්රතිශතයන් අතිශය ඉහළ මට්ටමක පවතින බව අමෙරිකාව පෙන්වා දෙයි. උදාහරණ ලෙස මත්පැන් සඳහා 150%ක්, කෝපි සහ වල්නට් සඳහා 100%ක්, මෝටර් රථ සඳහා 60%ක් සහ ඇපල් වැනි පළතුරු සඳහා 50%ක බදු මුදලක් අය කෙරේ. එසේම, ලෝක සෞඛ්ය සංවිධානයේ අත්යවශ්ය ඖෂධ ලැයිස්තුවට ඇතුළත් ජීවිතාරක්ෂක ඖෂධ සඳහා ද ඉන්දියාව ඉහළ රේගු බදු අය කරන බව මෙහි සඳහන් වේ.
ඉන්දියාවේ බදු අනුපාතයන් මහජන අදහස් විමසීමකින් තොරව වාර්ෂික අයවැය හරහා හෝ අතරමැද නිකුත් කරන නිවේදන මගින් ඕනෑම අවස්ථාවක වෙනස් කිරීම නිසා අමෙරිකානු ගොවීන්ට සහ ව්යාපාරිකයන්ට විශාල අවිනිශ්චිතතාවයකට මුහුණ දීමට සිදු වන බව අමෙරිකාව චෝදනා කරයි. කෙසේ වෙතත්, ඉන්දියාව 2026 අයවැය මගින් විද්යුත් වාහන බැටරි නිෂ්පාදනයට අවශ්ය අමුද්රව්ය සහ ඇතැම් ඖෂධ සඳහා බදු අඩු කර ඇති බව ද වාර්තාවේ පිළිගෙන ඇත.
මෙම චෝදනා හමුවේ ඉන්දියාව සැමවිටම ප්රකාශ කරන්නේ තම බදු ප්රතිපත්ති ලෝක වෙළඳ සංවිධානයේ (WTO) නීතිරීතිවලට අනුකූල වන බවයි. එහෙත් අමෙරිකාව පවසන්නේ ඉන්දියාව පනවා ඇති බලපත්ර අවශ්යතා (Licensing) සහ තත්ත්ව පාලන නියෝග (QCOs) වැනි බදු නොවන බාධක (Non-tariff barriers) හරහා අමෙරිකානු නිෂ්පාදන ඉන්දියානු වෙළඳපොළට ඇතුළු වීම සීමා වී ඇති බවයි.
