පාකිස්ථානයේ හිටපු අග්රාමාත්ය ඉම්රාන් ඛාන් මහතාගේ සෞඛ්ය තත්ත්වය සහ යහපැවැත්ම පිළිබඳව සොයා බලා, ඒ වෙනුවෙන් මානුෂීය මැදිහත්වීමක් සිදු කරන ලෙස ඉල්ලමින් විපක්ෂයේ පාර්ලිමේන්තු මන්ත්රී අජිත් පී. පෙරේරා මහතා පාර්ලිමේන්තුවට කල් තැබීමේ යෝජනාවක් ඉදිරිපත් කර තිබේ. දැනට අත්අඩංගුවේ පසුවන ඉම්රාන් ඛාන් මහතාගේ ජීවිත ආරක්ෂාව පිළිබඳව ජාත්යන්තර මට්ටමින් පවතින කනස්සල්ල මෙම යෝජනාවට පදනම් වී ඇත.
මෙම යෝජනාව මඟින් මන්ත්රීවරයා අවධාරණය කරන්නේ, රාජ්යතාන්ත්රික සහ පාර්ලිමේන්තු සබඳතා උපයෝගී කරගනිමින් පාකිස්ථාන බලධාරීන් සමඟ මේ සම්බන්ධයෙන් සාකච්ඡා කළ යුතු බවයි. විශේෂයෙන්ම ඉම්රාන් ඛාන් මහතාට ප්රමාණවත් සහ ස්වාධීන වෛද්ය ප්රතිකාර ලැබෙන බව සහතික කරන ලෙසත්, ජාත්යන්තර මානව හිමිකම් ප්රමිතීන්ට අනුකූලව ඔහු නිදහස් කිරීමට හෝ අවශ්ය සහනයක් ලබා දීමට අවශ්ය මානුෂීය ඉල්ලීම ශ්රී ලංකා රජය විසින් සිදු කළ යුතු බවත් එහි සඳහන් වේ.
විශ්වාසකටයුතු වාර්තා මඟින් හිටපු අගමැතිවරයාගේ සෞඛ්ය තත්ත්වය අයහපත් බවට මතු කර ඇති කරුණු කෙරෙහි රජයේ අවධානය යොමු විය යුතු බව අජිත් පී. පෙරේරා මහතා පෙන්වා දෙයි. කෙසේ වෙතත්, මෙම ඉල්ලීම සම්බන්ධයෙන් ශ්රී ලංකා රජය මෙතෙක් නිල වශයෙන් කිසිදු ප්රතිචාරයක් දක්වා නොමැත.
