ඉරානයට එරෙහිව දියත් කර ඇති ඒකාබද්ධ යුද මෙහෙයුම් හරහා එරට ඉස්ලාමීය පාලනය “ක්රමානුකූලව මර්දනය කරමින්” පවතින බව ඊශ්රායල අග්රාමාත්ය බෙන්ජමින් නෙතන්යාහු (Benjamin Netanyahu) ඊයේ (31) ප්රකාශ කළේය. යුදෙව්වන්ගේ ‘පේසැක්’ (Pesach) උත්සවයට පෙර ජාතිය අමතමින් ඔහු අවධාරණය කළේ ඊශ්රායලයට එල්ල වී ඇති පැවැත්ම පිළිබඳ තර්ජන මේ හරහා ඉවත් වෙමින් පවතින බවයි.
අමෙරිකාව සමඟ එක්ව දියත් කරන මෙම මෙහෙයුම් හරහා දශක ගණනාවක් තිස්සේ “අමෙරිකාවට මරණය, ඊශ්රායලයට මරණය” යනුවෙන් හඬ නැගූ ත්රස්තවාදී පාලනය අඩපණ කර ඇති බව අග්රාමාත්යවරයා සඳහන් කළේය. “අද හෝ හෙට ඉරාන පාලනය බිඳ වැටෙනු ඇති” බවත්, ඉරානයෙන් එල්ල වන පොදු තර්ජනයට එරෙහිව කලාපයේ වැදගත් රටවල් සමඟ ඊශ්රායලය නව සන්ධාන ගොඩනගමින් සිටින බවත් ඔහු පැවසීය.
මෙම ජයග්රහණ ලබා ගැනීම සඳහා ලෙබනනයේ ගොඩබිම් මෙහෙයුම්වලදී මියගිය සෙබළුන් වෙනුවෙන් ඔහු ශෝකය පළ කළ අතර, මෙම ජයග්රහණ “වේදනාකාරී පිරිවැයක්” (Painful costs) දරා ලබාගත් ඒවා බව ද සිහිපත් කළේය. ඉරානයේ න්යෂ්ටික වැඩසටහන්, බැලැස්ටික් මිසයිල සහ ත්රස්තවාදී කණ්ඩායම්වලට අරමුදල් සැපයීම වැනි ක්රියා හරහා ලෝකයටම එල්ල වූ තර්ජනය දැන් අවසන් වෙමින් පවතින බව ද ඔහු වැඩිදුරටත් කියා සිටියේය.
