ඉරානයට එරෙහිව ඇමරිකාව සහ ඊශ්රායලය දියත් කර ඇති යුද්ධයට මසක් සපිරෙන්නට ආසන්නව තිබියදී, ඉරානය සතු මිසයිල බලයෙන් විනාශ වී ඇත්තේ තුනෙන් එකක ප්රමාණයක් පමණක් බව ඇමරිකානු බුද්ධි අංශ වාර්තා උපුටා දක්වමින් රොයිටර් පුවත් සේවය වාර්තා කරයි. මෙම වාර්තාව ජනාධිපති ඩොනල්ඩ් ට්රම්ප් විසින් ඉරානයේ යුද ශක්තිය පිළිබඳව සිදු කරන ප්රසිද්ධ ප්රකාශයන්ට වඩා බෙහෙවින් වෙනස් තත්ත්වයක් පෙන්නුම් කරන බව එම පුවත් සේවය පෙන්වා දෙයි.
බුද්ධි අංශ දත්තවලට අනුව ඉරාන මිසයිලවලින් තවත් තුනෙන් එකක ප්රමාණයක් භූගත බංකර් සහ උමං මාර්ග තුළ සුරක්ෂිතව හෝ හානි වී පවතින අතර ඉතිරි ප්රමාණය තවමත් ක්රියාකාරී මට්ටමේ පවතී. මිසයිල මෙන්ම ඉරානයේ ඩ්රෝන (Drones) බලයෙන් ද විනාශ වී ඇත්තේ තුනෙන් එකක් පමණක් බව අදාළ වාර්තාවල සඳහන් වේ. ඉරානය සතුව ඇත්තේ ඉතා සුළු රොකට් ප්රමාණයක් බව ජනාධිපති ට්රම්ප් ප්රසිද්ධියේ ප්රකාශ කළද, ඉන් 1% ක ප්රමාණයක් හෝ ඉතිරිව තිබීම බිලියන ගණනක් වටිනා නෞකාවලට බරපතල තර්ජනයක් බව ඔහු කැබිනට් මණ්ඩල හමුවකදී පිළිගෙන ඇති බව ද වාර්තාවේ සඳහන් වේ.
හෝමුස් සමුද්ර සන්ධියේ ආරක්ෂාව තහවුරු කිරීම සඳහා ඇමරිකානු ගොඩබිම් හමුදා ඉරාන වෙරළ තීරයට යෙදවීමට ජනාධිපතිවරයා මේ වන විට සලකා බලමින් සිටින බව රොයිටර් පුවත් සේවය වැඩිදුරටත් වාර්තා කරයි. කෙසේ වෙතත් මේ පිළිබඳව අදහස් දක්වන පෙන්ටගන නිලධාරියෙකු ප්රකාශ කර ඇත්තේ යුද්ධය ආරම්භයේ සිට ඉරානයේ මිසයිල සහ ඩ්රෝන ප්රහාර එල්ල කිරීමේ හැකියාව 90% කින් පමණ අඩු වී ඇති බවයි. එමෙන්ම ඉරානයේ මිසයිල සහ නාවික නිෂ්පාදන මධ්යස්ථානවලින් 66% ක් පමණ දැනටමත් විනාශ කර ඇති බව ද ඔහු සඳහන් කර තිබේ.
