අමෙරිකානු ජනාධිපති ඩොනල්ඩ් ට්රම්ප් ඉරානයට එරෙහිව ප්රසිද්ධියේ දැඩි තර්ජන එල්ල කළද, අවම වශයෙන් පසුගිය මාර්තු මාසයේ සිටම ධවල මන්දිරය රහසිගතව තාවකාලික සටන් විරාමයක් සඳහා උත්සාහ කර ඇති බව Financial Times පුවත්පත වාර්තා කරයි. ට්රම්ප් විසින් ලබා දුන් අවසාන නිවේදනය ක්රියාත්මක වීමට මොහොතකට පෙර, පාකිස්ථාන හමුදා ප්රධානී අසීම් මුනීර් මෙම සාකච්ඡාවල ප්රධාන මැදිහත්කරු ලෙස කටයුතු කර ඇති බවත්, ඔහු ට්රම්ප්, ජේ.ඩී. වෑන්ස් සහ ස්ටීව් විට්කොෆ් වැනි ඉහළ පෙළේ අමෙරිකානු නිලධාරීන් සමඟ දුරකථන සාකච්ඡා වට කිහිපයක් පවත්වා ඇති බවත් එම වාර්තාවේ සඳහන් වේ.
මෙම රාජ්ය තාන්ත්රික ප්රයත්නයන්හි මූලික අරමුණ වී ඇත්තේ ගෝලීය තෙල් සැපයුමේ ප්රධාන මාර්ගයක් වන හෝමුස් සමුද්ර සන්ධිය (Strait of Hormuz) යළි විවෘත කිරීම සහ කලාපීය යුදමය තත්ත්වය තාවකාලිකව පාලනය කිරීමයි. ට්රම්ප්ගේ දැඩි ප්රකාශ හමුවේ වුවද, පසුගිය මාර්තු 21 වනදා තරම් ඈත අතීතයක සිටම අමෙරිකාව පාකිස්ථානය හරහා මෙම රහසිගත සාකච්ඡා මාර්ගය (Back channel) පවත්වාගෙන ගොස් ඇති බව හෙළි වී තිබේ.
අවසානයේදී අඟහරුවාදා රාත්රියේ අමෙරිකාව, ඉරානය සහ ඊශ්රායලය සති දෙකක සටන් විරාමයක් ප්රකාශයට පත් කළේය. ට්රම්ප් විසින් ඉරානයේ “සම්පූර්ණ ශිෂ්ටාචාරයම විනාශ කළ හැකි” බවට අනතුරු අඟවා පැය කිහිපයකට පසුව මෙම තීරණයට එළඹීම විශේෂත්වයක් වන අතර, මෙහිදී අසීම් මුනීර්ගේ මැදිහත්වීම සටන් විරාමය ස්ථිර කර ගැනීමට තීරණාත්මක සාධකයක් වූ බව ද වාර්තා වේ.
