උතුරු පළාතේ වගා කටයුතු සඳහා ජලය ලබාදීමේ අරමුණින් රජය සැලසුම් කර ඇති ‘කිවුල් ඔය’ ජලාශ ව්යාපෘතියට එරෙහිව අද (02) පස්වරුවේ නෙඩුන්කේනි නගරයේදී දැවැන්ත විරෝධතාවක් පැවැත්විණි. වැලිඔය ඇතුළු ප්රදේශ කිහිපයක ජනතාව සහ උතුරු පළාත නියෝජනය කරන දෙමළ දේශපාලන පක්ෂ නායකයින් මෙම විරෝධතාව සඳහා එක්ව සිටියහ.
විරෝධතාකරුවන් චෝදනා කර සිටින්නේ, මෙම ජල ව්යාපෘතිය මුවාවෙන් උතුරු පළාතේ ඉඩම් දකුණේ ජනතාවට ලබා දී රජය විසින් සූක්ෂ්ම ලෙස ජනාවාසකරණයක් සිදු කිරීමට උත්සාහ කරන බවයි. ව්යාපෘතිය හරහා සිදුවන බව කියන මෙම ඉඩම් අත්පත් කර ගැනීම් සහ ජන විකාශන වෙනස්කම්වලට තමන් දැඩි ලෙස විරුද්ධ වන බව ඔවුහු මෙහිදී අවධාරණය කළහ. මේ හේතුවෙන් වහාම අදාළ ව්යාපෘතිය අත්හිටුවන ලෙස බල කරමින් පිරිස නෙඩුන්කේනි නගරය පුරා විරෝධතා පාඨ කියමින් ගමන් කළහ.
