රුපියල් කෝටි 5 කට ආසන්න වටිනාකමින් යුත් ඉස්සන් අඩංගු කන්ටේනර් දෙකක් වරායෙන් නිදහස් කර නොගෙන විවෘත වෙළෙඳපොළේ අලෙවි කිරීමේ උත්සාහයක් පවතින බවට වරාය භාණ්ඩ ලංසුකරුවන් චෝදනා කරති.
මෙම කන්ටේනර් දෙක ඇමරිකාවෙන් ආනයනය කර ඇති අතර, එහි ඉස්සන් කිලෝග්‍රෑම් 50,000 ක් පමණ අඩංගු බවට ඔවුන් පවසයි.
වරාය අධිකාරිය ලබන පෙබරවාරි 28 වැනිදා පැවැත්වීමට නියමිත වෙන්දේසියට මෙම කන්ටේනර් දෙක ලැයිස්තු ගතකර නොමැති බවට ලංසුකරුවන් අවධාරණය කරයි.
මීට අමතරව, මෙම ඉස්සන් අඩංගු කන්ටේනර් දෙක වරායෙන් නිදහස් කරගැනීමට ව්‍යාපාරිකයෙක් යැයි කියන පුද්ගලයෙකුට වරාය අධිකාරියේ උසස් නිලධාරියෙකු සහ ශ්‍රී ලංකා රේගුවේ නිලධාරීන් කීපදෙනකුගේ සහය ලැබී ඇති බවට චෝදනා එල්ල වී ඇත. මෙම ක්‍රියාවලිය තුළින් රජයට අයවිය යුතු විශාල බදු මුදලක් අහිමි වී ඇති බවට ද ඔවුහු පවසති.
ලංසුකරුවන් අනුව, මිනිස් පරිභෝජනයට නුසුදුසු ආහාර ද්‍රව්‍ය සත්ත්ව ආහාර ලෙස හෝ වෙන්දේසි නොකර විනාශ කරන මුවාවෙන් වරායෙන් රැගෙන යෑමේ ක්‍රියාදාමයක් සිදුව ඇති බවට සැකයක් පවතී. මීට අමතරව, සෞඛ්‍ය අමාත්‍යාංශයේ අධීක්ෂණයක් නොමැතිව මෙවැනි ආහාර වෙළෙඳපොළට නිකුත්වීම ජනතාවගේ සෞඛ්‍යයට දැඩි හානියක් විය හැකි බවට ද ඔවුන් අනතුරු අඟවයි.
මෙම සිදුවීම පිළිබඳව විමර්ශනයක් අවශ්‍ය බවට ලංසුකරුවන් ඉල්ලා සිටින අතර, රජයේ අදාළ ආයතන වහාම මෙම කන්ටේනර් දෙක විනාශ කිරීමට කටයුතු ගත යුතු බවට ද ඔවුහු ඉල්ලා සිටියහ.
මෙම අවස්ථාවේදී, වරාය අධිකාරිය සහ රේගු දෙපාර්තමේන්තුවේ නිලධාරීන්ගේ කාර්යභාරය පිළිබඳව දැඩි ප්‍රශ්න එල්ල වී ඇති අතර, එම නිලධාරීන් පිළිබඳව විමර්ශනයක් දිය යුතු බවට ඉල්ලීම් ද එල්ල වී ඇත.
