ශ්‍රී ලංකාවේ කැනෝයිං සහ කයාකිං ජාතික සංගමය විසින් පවත්වන ලද චීන – ශ්‍රී ලංකා මිත්‍රත්ව ඩ්‍රැගන් බෝට්ටු ශූරතාවලිය ඊයේ ( මැයි 31 ) දින දියවන්නා ඔරු පැදීමේ මධ්‍යස්ථානයේදී කණ්ඩායම් 25 ක සහභාගීත්වයෙන් පැවැත් විය.
මෙම අවස්ථාවට තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ , තරුණ කටයුතු නියෝජ්‍ය අමාත්‍ය එරංග ගුණසේකර, චීන තානාපති, කී ශැන්හොන් මහතා සහභාගී වී සිටියහ.
චීන – ශ්‍රී ලංකා මිත්‍රත්ව ඩ්‍රැගන් බෝට්ටු ශූරතාවලියෙන් ජයග්‍රහණය කළ ක්‍රීඩක ක්‍රීඩිකාවන් හට කුසලාන සහ සහතිකපත්‍ර පිරි නැමීමත්, මහජන චීන සමූහාණ්ඩුවෙන්, ලක්ෂ 50 ක වටිනාකමක් සහිත මකර බෝට්ටු පහක් මෙරටට ලබා දීමත් මෙම අවස්ථාවේ දී සිදු කෙරිණි.
මෙම අවස්ථාවට එක්වෙමින් තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ පැවසුවේ, මෙම චීන-ශ්‍රී ලංකා මිත්‍රත්ව කුසලාන ශූරතාවලිය සහ මකර බෝට්ටු උළෙල දෙරට අතර මිත්‍රත්වයේ, සංස්කෘතියේ සහ සහයෝගීතාවයේ ප්‍රබල සංකේතයක් බවයි.
ශ්‍රී ලංකා රජය සහ තරුණ කටයුතු සහ ක්‍රීඩා අමාත්‍යාංශය වෙනුවෙන්, මෙරටට මකර බෝට්ටු පහක් පරිත්‍යාග කිරීම සම්බන්ධයෙන් මහජන චීන සමූහාණ්ඩුවේ තානාපති කාර්යාලයට ස්තූතිවන්ත වන බවත්,මෙම සුවිශේෂී ත්‍යාගය ශ්‍රී ලංකාවේ ජල ක්‍රීඩාව ප්‍රවර්ධනය කිරීමේ දී සැලකිය යුතු පියවරක් ඉදිරියට තැබීමට උපකාරී වන බවත් අමාත්‍යවරයා පැවසුවේ ය.
මෙම ශූරතාවලියට එක් වූ යාපනයේ පාසල්වල සිසු දරුවන් විශේෂයෙන් අගය කරන බවත්, එය ජාතික සමගිය ප්‍රවර්ධනය කරන සංකේතයක් බවත්, කලාපය නියෝජනය කිරීමට දක්වන ධෛර්යය, දක්ෂතාවය සහ කැපවීම ගැන ආඩම්බර වන බවත් අමාත්‍යවරයා මෙහිදී වැඩිදුරටත් අදහස් දැක්විය.
උතුරේ සිට දකුණටත්, නැගෙනහිර සිට බටහිරටත් මුළු දිවයින පුරාම ජල ක්‍රීඩා පුළුල් කිරීම සහ ප්‍රවර්ධනය කරමින් ඔරු පැදීම, කයාකිං හෝ ඩ්‍රැගන් බෝට්ටු ධාවන ආදී ජල ක්‍රීඩා සඳහා මෙරට තරුණ තරුණියන්ට මංපෙත් විවර කර දීමටත්, එමෙන්ම සංචාරක ව්‍යාපාරය නංවාලීමටත් ඉදිරියේදී බලාපොරොත්තු වන බව තරුණ කටයුතු සහ ක්‍රීඩා අමාත්‍යවරයා පැවසුවේ ය.
