ජීවිතවල විවිධ වෙනස්කම් දැකගන්නට හැකියාවක් පවතිනවා..
මේ කියන්න යන්නේත් අන්න ඒ වගේ තවත් එක කතාවක්..
පුද්ගලයෙකු තමන්ගේ ජීවිතයේ උසස් ජීවන තත්ත්වයක් හිමිකර ගැනුමට කැමැතියි.. මේ නිසාම එකී උසස් ජීවන තත්ත්වය අත්පත්කර ගැනුමට මිනිසා උපන් දා සිටම නොනවතින ජීවන අරගලයක යෙදෙනවා.. අධ්‍යාපනය අතින් ඉහළට යමින්ද, ධනයෙන් බලයෙන් ආඪ්‍යවීමට මුදල් රැස් කරමින් ද එකිනෙකා තළා පෙළා දමමින් ඉදිරියට යාමට ද පුද්ගලයා දෙවරක් නොසිතන සමාජයක් අද බිහිව තිබෙනවා..
කෙසේ වෙතත් උත්පත්ති ග්‍රහබලය මත මෙකී උසස් ජීවන තත්ත්ව ළඟාකර ගැනුමට ද පුද්ගලයන් වාසනාවන්ත වෙනවා.. කිසිදු ආකාරයක මහන්සියකින් තොරව උත්පත්ති ග්‍රහබලයේ බලවත් බව අනුව මෙකී උසස් ජීවන තත්ත්ව ළඟා කර ගන්නා ජන්මින් අපට හමුවෙනවා.. විශේෂයෙන්ම රජයේ විවිධ උසස් තනතුරු දරමින් රටට සේවය කරන්නට වාසනාව ලද මෙවැනි ජන්මීන්ගේ කේන්දරවල යෙදෙන ග්‍රහ පිහිටීම් මත ඔවුන් ලබන රාජ වරප්‍රසාද පිළිබඳ කරුණු කාරණා සඳහන් වී තිබෙන බව පෙනෙනවා.. රාජ්‍ය සම්බන්ධ උසස් වරප්‍රසාද භුක්ති විඳි මට හිමිවන ග්‍රහයෝග පිළිබඳ මෙවර කතා බහ කරනවා..
රාජ යෝගවලදී යම් යම් පුද්ගලයන් උසස්ම වරප්‍රසාද ලැබීම, ඉහළ මට්ටමේ පාලන තනතුරු, පාලක තනතුරු, මැති ඇමැති තනතුරු ආදී රාජයෝග බලයෙන් අනූන යම් යම් වරප්‍රසාද ලබනු ඇති අතර, මීට පරිබාහිරව යම් යම් පුද්ගලයන් රාජ්‍යය සම්බන්ධ යෝගවලින්ද යුක්ත වෙනවා.. එවැන්නෝ පාලකයන් සමඟ සම්බන්ධවීම, මැති ඇමැතිවරුන් ආදීන්ගේ ලේකම්වරු නැතහොත් උපදේශකවරු ඊට සම්බන්ධ ආයතන ප්‍රධානීන් හෝ එම රාජ්‍ය සම්බන්ධය නිසා ඉහළ මට්ටමේ වගකීම් දරන අය බවට පත්විය හැකියි… යම් යම් සංස්ථා මණ්ඩලවල සභාපති, සාමාන්‍යාධිකාරි, අධ්‍යක්ෂ ජනරාල් වැනි තනතුරු ලැබීමට ද මේ පිහිටීම් හේතු වෙනවා…
රාජ්‍ය සම්බන්ධ යෝග මත එවැනි තනතුරු හා වරප්‍රසාද ලැබෙන බව කිව යුතුයි… මේ ආකාරයට ග්‍රහයන් පිහිටීමෙන් එකී යෝග ජන්මින්ට යෙදෙනවා..
1. දහවැන්න අධිපතියා චර ආත්ම කාරකයා සමඟ සම්බන්ධ ද නැතහොත් දෘෂ්ටියෙන් යුක්ත ද එසේත් නැතහොත් චර අමාත්‍යකාරකයා සිටින රාශි අධිපතියා සමඟ සම්බන්ධ ද එවැන්නෝ, රජුගේ හෝ රාජ්‍යමය ආයතනවල ඉහළ මට්ටමේ තනතුරු ලබන්නෝ විය හැකියි…
2. 11 වැන්නාධිපතියා 11 වැන්න දකී ද එහි පාපියෝ නොමැතිද එමෙන්ම 10 වැන්නට දෘෂ්ටිය හෙළන්නේ ද ඔවුහු රාජ්‍යමය අංශයට සම්බන්ධ ඉහළම තනතුරු ලබන උසස් නිලධාරීන් විය හැකිය. අග්‍රාමාත්‍ය ලේකම්, ජනාධිපති ලේකම් තනතුරු ලැබීමට මේ ග්‍රහයෝග හේතුවෙනවා..
3. චර ආත්මකාරකයා සහ චර අමාත්‍යකාරකයා එකට එක්වී සිටියිද පුද්ගලයා ඉතා ඥානවන්ත අයකු වන අතර ඔහුට ඇමැතිවරයෙක් වීමට ද අවකාශ පවතිනවා…
4. චර අමාත්‍යකාරකයා ඉතාමත් බලවත් ද ඔහු ඔහුගේම රාශියේ හෝ උච්ච රාශියේ වේ ද එම ජන්මියා ඇමැතිවරයකු වීමට අවකාශ ඇත..
5. අමාත්‍ය කාරකයා නොහොත් 2 වැනි තැනට වැඩිම අංශක ගණනින් යුත් ග්‍රහයා ලග්නයෙන් ත්‍රිකෝණයේ වේද ඔහු ප්‍රසිද්ධ අමාත්‍යවරයකු විය හැකියි…
6. අමාත්‍යකාරකයා ආත්ම කාරකයාගෙන් කේන්ද්‍රස්ථානයක හෝ ත්‍රිකෝණස්ථානයක වේද පුද්ගලයා රජු සමඟ සම්බන්ධකම් ඇති නැතහොත් රජුගේ ඇසුර ලබන්නෙක්..
7. කේන්ද්‍රයේ 3, 6 ආදී ස්ථානවල පාපියෝ වේද ඔවුන් මෙසේ සිටිනුයේ ලග්නයෙන් නොවේ නම් ආරූඪ ලග්නය වුව ද කම් නැහැ… එසේ නැතහොත්, ආත්මකාරකගෙන් 3, 6 වුවත් මෙය බලවත් පිහිටීමක් ලෙස සැලකේ. එවැන්නෝ හමුදාවේ, පොලීසියේ ඉහළ තනතුරු දරනවා…
8. චර ආත්මකාරකයා තමාගේම හෝ උච්ච රාශියේ වෙමින් කේන්ද්‍රස්ථානයක වේද එසේ නැතහොත්, ත්‍රිකෝණස්ථානයක වේද 9 වැන්න අධිපතියා ඊට සම්බන්ධ වේද පුද්ගලයා ඉහළ මට්ටමේ ඇමැති තනතුරක් දරනවා..
9. ආත්ම කාරකයා චන්ද්‍රයා සිටින රාශි අධිපතියා වේද ඔහු ලග්නයෙහි සුබයෙක් සමඟ වේද එසේ වුවොත් ඔහු ජීවිතයේ අගභාගයේ දී ඇමැති තනතුරක් දරන්නෙකු විය හැකියි…
10. ආත්මකාරකයා 5, 7, 9, හෝ 10 සිටිත් ද එය සිටිනුයේ සුබයන් සමඟ ද එම ජන්මියා රවි සමඟ සම්බන්ධතාවන් දක්වන අතර රාජ්‍යමය කටයුතු පදනම් කරගෙන ධනය උපයා ගන්නවා.. මෙහි රජු යන්න රාජ්‍ය පාලකයා ලෙස යොදා ගත්ත ද කම් නැහැ…
11. 9 වැන්නෙහි ආරූඪ පදය හෙවත් භාග්‍යය පදය ලග්නයට පතිතවේද එසේත් නැතහොත් ආත්මකාරකයා ලග්නයේ වේද එම ජන්මියා රාජ්‍ය පාලකයා හෝ රජු සමඟ සම්බන්ධ වීමේ වාසනාවෙන් යුක්තයි…
12. 11 වැන්නාධිපතියා 11 වැන්නේ පාප සංයෝගවලින් තොරව සිටීද ආත්ම කාරකයා සුබයන් සමඟ වේද ජන්මියා රාජ්‍යමය සම්බන්ධතාවයන් මත ඉහළ මට්ටමේ වරප්‍රසාද සහිත ධනයක් ලබන්නේ ය.
13. සඳු හා සිකුරු ආත්මකාරකගෙන් 4 වැනි රාශියේ සිටියි ද ඔහු රාජ්‍ය ලාංඡනය හෙවත් ඊට සම්බන්ධ පලඳනාවන්ගෙන් යුක්ත අයකි. එය නිල පලඳනාවකි.
14. ලග්නාධිපති හෝ ආත්මකාරකයා පස්වැන්නාධිපතියා සමඟ කේන්ද්‍රස්ථානයක හෝ ත්‍රිකෝණස්ථානයක සම්බන්ධවේද එම පුද්ගලයා රජු සමඟ හෝ රාජ්‍ය පාලකයා සමඟ දැඩි සම්බන්ධතාවන් ඇති අයකු වේ.
මේ ආකාරයට රාජ්‍ය යෝග එනම් රාජ්‍ය අංශයේ වරප්‍රසාද, ඉහළ තනතුරු, රැකියා යනාදී ලෙස විවිධ ධනය ඉපැයිය හැකි තත්ත්ව මෙකී ග්‍රහ සංයෝග, දෘෂ්ටි අනුව ජන්මීන්ට යෙදෙන බව පැහැදිලි කර ගත යුතුයි..
සුබසෙත පුවත්පත ඇසුරෙන්..
