හිටපු වෙළඳ අමාත්‍ය ජොන්ස්ටන් ප්‍රනාන්දු, සතොස හිටපු සභාපති එරාජ් ප්‍රනාන්දු සහ ඔහුගේ සම්බන්ධීකරණ ලේකම් මොහොමඩ් සාකීර් යන අයෙකුට එරෙහිව අල්ලස් හෝ දූෂණ චෝදනා විමර්ශන කොමිසම ගොනු කර ඇති නඩුව දෙසැම්බර් 17 වන දා දක්වා කල් තැබීමට කොළඹ මහාධිකරණ විනිසුරු මොහොමඩ් මිහාල් මහතා නියෝග කර තිබෙනවා.
මෙම නඩුව සම්බන්ධව විත්තිකරුවන්ට එල්ල වී ඇත්තේ, ජොන්ස්ටන් ප්‍රනාන්දු වෙළඳ අමාත්‍යවරයා ලෙස කටයුතු කළ සමයේදී සතොස සේවකයින් දේශපාලන කටයුතුවල යෙදවීමෙන් රජයට හානි කිරීමක් සිදු කිරිමේ යන චෝදනාව යටතේයි.
නඩුව විභාගයට ගත් අවස්ථාවේදී, පැමිණිල්ල වෙනුවෙන් සාක්ෂි සටහන් කර ගැනීම සිදු විය. විත්තිකරුවන් වෙනුවෙන් පෙනී සිටි නීතීඥවරු අධිකරණය හමුවේ සඳහන් කළේ, එකම චෝදනාව යටතේ 2010, 2011, 2012 හා 2014 වර්ෂයන්ට අදාළව වෙන්ව නඩු 4ක් ගොනු වී ඇති බවයි.
එම නිසා එකම අධිකරණයකදී සියලු නඩු විභාගය සිදු කිරීම සාධාරණ විභාගයකට බාධාවක් විය හැකි බව පෙන්වා, නඩු වෙනත් අධිකරණයකට යොමු කරන ලෙස ඔවුන් ඉල්ලා සිටියේය.
නියෝජ්‍ය සොලිසිටර් ජෙනරාල් වසන්ත පෙරේරා මහතා එම ඉල්ලීම ප්‍රතික්ෂේප කරමින්, ඒ අනුව සාධාරණ විභාගයකට කිසිඳු බාධාවක් නොමැති බව*අධිකරණයට පැවසීය.
කරුණු සලකා බැලූ විනිසුරුවරයා විත්තිකරුවන්ගේ ඉල්ලීම ප්‍රතික්ෂේප කරමින්, නඩු විභාගය ආරම්භ කිරීමට නියෝග කළා.
