ලෝක සෞඛ්ය සංවිධානය (WHO) සමඟ පැවති දශක අටකට ආසන්න සබඳතාව නිමා කරමින් ඇමෙරිකා එක්සත් ජනපදය අද (23) එම සංවිධානයෙන් නිල වශයෙන් ඉවත් විය.
ජනාධිපති ඩොනල්ඩ් ට්රම්ප් සිය දෙවන ධුර කාලය ආරම්භ කළ පළමු දිනයේදීම (2025 ජනවාරි 20) නිකුත් කළ විධායක නියෝගයකට අනුව, වසරක නිල දැනුම්දීමේ කාලසීමාව අවසන් කරමින් මෙම ඉවත් වීම සිදු කර තිබේ.
කොවිඩ්-19 වසංගතය පාලනය කිරීමේදී ලෝක සෞඛ්ය සංවිධානය අසාර්ථක වූ බවටත්, එය දේශපාලනික බලපෑම්වලට යටත්ව කටයුතු කරන බවටත් චෝදනා කරමින් ජනාධිපති ට්රම්ප් මෙම දැඩි තීරණය ගෙන ඇත.
මෙම ඉවත් වීමත් සමඟ ඇමෙරිකාව ලෝක සෞඛ්ය සංවිධානය වෙත ලබාදුන් අතිවිශාල මූල්ය දායකත්වය, තාක්ෂණික සහයෝගය සහ විද්යාඥයන්ගේ සේවය සම්පූර්ණයෙන්ම නතර වේ. ලෝක සෞඛ්ය සංවිධානයේ දත්තවලට අනුව, ඇමෙරිකාව එම සංවිධානයට ඩොලර් මිලියන 260කට අධික හිඟ මුදලක් ගෙවීමට ඇති අතර, එම මුදල් පියවන තෙක් ඉවත් වීම සම්පූර්ණ නොවන බව සංවිධානය පවසයි. කෙසේ වෙතත්, ඇමෙරිකානු රජය ප්රකාශ කර ඇත්තේ මින් ඉදිරියට ගෝලීය සෞඛ්ය කටයුතු සඳහා ද්විපාර්ශ්වික ගිවිසුම් හරහා සෘජුවම අනෙකුත් රටවල් සමඟ කටයුතු කරන බවයි.
ලෝක සෞඛ්ය සංවිධානයට අමතරව, එක්සත් ජාතීන්ගේ පලස්තීන සහන ඒජන්සිය (UNRWA), මානව හිමිකම් කවුන්සිලය සහ යුනෙස්කෝ (UNESCO) වැනි තවත් ජාත්යන්තර ආයතන 60කට අධික සංඛ්යාවකින් ඉවත් වීමට හෝ ඒවායේ අරමුදල් කප්පාදු කිරීමටද ජනාධිපති ට්රම්ප් පියවර ගෙන තිබේ. මෙම තීරණය ගෝලීය රෝග නිරීක්ෂණ කටයුතු සහ වසංගත මර්දන වැඩපිළිවෙළ කෙරෙහි දැඩි බලපෑමක් එල්ල කළ හැකි බවට ජාත්යන්තර සෞඛ්ය විශේෂඥයෝ අනතුරු අඟවති.
