කොවිඩ් වසංගතයත් සමග රුසියාවේ කොවිඩ් පරික්ෂා කිරීමේ කට්ටල හිඟයක් ඇතිවූ අවස්ථාවේදී එවකට ඇමෙරිකානු ජනපතිව සිටි ඩොනල්ඩ් ට්‍රම්ප් රුසියානු ජනපති ව්ලැදිමීර් පුටින්ගේ පුද්ගලික පාවිච්චිය සඳහා හොර රහසේ කොවිඩ් පරික්ෂා කිරීමේ කට්ටල යවා ඇතැයි ඇමෙරිකානු මාධ්‍යවේදියකු වන බොබ් වුඩ්වර්ඩ් ලබන 15 වැනිදා එළිදැක්වීමට නියමිත ‘වෝ’ ග්‍රන්ථයේ සටහන් වේ.
එසේම ට්‍රම්ප් 2021 වසරේදී ධවල මන්දිරය හැර යාමෙන් පසු අවම වශයෙන් සත් වතාවක් පුටින් සමග දුරකතන සංවාදවල යෙදී ඇති බවත් එක් දුරකතන සංවාදයකදී ඔහුගේ නිවසේ සිටි ආධාරකරුවකුට පුටින් සමග කතා කිරීමට අවශ්‍ය බැවින් පිටතට යන ලෙස ට්‍රම්ප් පවසා ඇති බවත් එහි දැක්වේ.
81 වැනි වියේ පසුවන බොබ් වුඩ්වර්ඩ්, ‘වෝ’ ග්‍රන්ථයෙන් මැද පෙරදිග සහ යුක්රේන යුද්ධයේ මෙන්ම ඇමෙරිකානු ජනාධිපතිවරණය සඳහා කරන අරගලයේ තිරය පිටුපස කතා ඇතුළත් වේ. කෙසේ නමුත් මෙම ග්‍රන්ථය මගින් එල්ල කරන චෝදනා කිසිවක් තහවුරු කළ නොහැකි බවද පැවැසෙයි.
වත්මන් ඇමෙරිකානු ජනාධිපති ජෝ බයිඩන් ඊශ්‍රායල සහාය දැක්වූවත් එරට අග්‍රාමාත්‍ය බෙන්ජමින් නෙදන්යාහුට කිසිම කැමැත්තක් නොදක්වන බවත් ගාසා තිරයේ ගැටුම් උත්සන්න වූ අවස්ථාවේ බයිඩන්ගේ ආධාරකරුවකු සමග අග්‍රාමාත්‍යවරයාට පරුෂ වචනයෙන් බන ඇති බවත් වුඩ්වර්ඩ් සිය ග්‍රන්ථය පිළිබඳ අදහස් දක්මින් පවසා ඇත. එහිදී නෙදන්යාහු අසත්පුරුෂයකු බව ඔහු ප්‍රකාශ කර ඇතැයිද එහි සඳහන් වේ.
එසේම රුසියානු ජනපති පුටින් ක්‍රිමියාව 2014 වසරේ ආක්‍රමණය කළ මොහාතේ එවකට ජනපති බැරැක් ඔබාමා ක්‍රියා කළ ආකාරය සම්බන්ධයෙන්ද ජනපති බයිඩන් විවේචනය කර ඇතැයිද “වෝ” ග්‍රන්ථයේ දැක්වේ. පුටින් සෙබළුන් 175,000 යොදාගෙන යුක්රේනය ආක්‍රමණය කිරීමට යන බව 2021 වසරේදී ඇමෙරිකාව බුද්ධි තොරතුරු ලැබී තිබී ඇති බවත් ක්‍රෙම්ලිනයේ සිටින ඉහළ නිලධාරියකුගෙන් එම තොරතුරු ලැබී ඇති බවත් සිය ග්‍රන්ථය පිළිබඳ අදහස් දක්මින් වුඩ්වර්ඩ් පවසා ඇත.
ලබන 15 වැනිදා එළිදැක්වෙන ‘වෝ’ ග්‍රන්ථය පිළිබඳ සම්මුඛ සාකච්ඡාවක් ලබා දිම්න් වුඩ්වර්ඩ් මෙම අදහස් පළ කර තිබිණි.
