ප්රමිතියෙන් තොර ඇස් බෙහෙත් වර්ගයක් රෝහල්වලට නිකුත් කිරීමට පෙර නිසි ලෙස පරීක්ෂා කිරීමට බලධාරීන් පියවර නොගැනීම හේතුවෙන් රෝගීන් දාහත් දෙනෙකුගේ පෙනීම අහිමි වී ඇති බව ජාතික විගණන කාර්යාලය කළ අලුත්ම විමර්ශනයකදී අනාවරණය වී තිබේ.
Prednisone Acetate Eye Drop නමැති මෙම ඖෂධය 2023 වසරේදී අක්ෂි රෝගීන් සඳහා භාවිතා කර ඇති අතර, එය භාවිත කළ නුවරඑළිය රෝහලේ රෝගීන් 12 දෙනෙකුගේ එක් ඇසක පෙනීම ස්ථිරවම අහිමි වී ඇති බව විගණන වාර්තාවේ සඳහන් වේ. මීට අමතරව තවත් රෝගීන් තිදෙනෙකුගේ පෙනීම 70% කට වඩා අහිමි වී ඇති බවත්, තත්ත්වයෙන් අසමත් වූ මෙම ඖෂධය රෝහල් පද්ධතියට බෙදා හැරීමට පෙර ප්රමාණවත් ගුණාත්මක පරීක්ෂාවන් සිදු කර නොමැති බවත් විගණන කාර්යාලය අවධාරණය කරයි.
මෙම ඛේදජනක සිද්ධිය සම්බන්ධයෙන් අගතියට පත් රෝගීන් 17 දෙනා සඳහා පසුගිය වසරේදී අමාත්ය මණ්ඩල තීරණයක් මත රුපියල් එක් කෝටි හතළිස් ලක්ෂයක කරුණා සහගත දීමනාවක් ගෙවා ඇති නමුත්, අනෙකුත් රෝහල්වල මෙවැනිම තත්ත්වයට මුහුණ දුන් රෝගීන්ට වන්දි ලබා දීමට මෙතෙක් පියවර ගෙන නොමැති බව විගණන වාර්තාව පෙන්වා දෙයි.
තත්ත්වය එසේ වුවත්, අදාළ බාල ඖෂධ සැපයූ සමාගමෙන් වන්දි ලබා ගැනීමට සෞඛ්ය බලධාරීන් මෙතෙක් කිසිදු ක්රියාමාර්ගයක් ගෙන නොමැති බව ද 2024 වාර්ෂික විගණන වාර්තාව මගින් වැඩිදුරටත් අනාවරණය කර ඇත. ඖෂධයක් රෝහල් වෙත නිකුත් කිරීමට පෙර පැවතිය යුතු දැඩි නියාමන ක්රියාවලිය මෙහිදී නිසි ලෙස ක්රියාත්මක නොවීම මෙම බරපතල සෞඛ්ය ගැටලුවට සෘජුවම බලපා තිබේ.
