රත්නපුර දිස්ත්‍රික් පාර්ලිමේන්තු මන්ත්‍රීනී තලතා අතුකෝරල ඉල්ලා අස්වීමෙන් පුරප්පාඩු වූ පාර්ලිමේන්තු මන්ත්‍රී ධූරය සඳහා සමගි ජන බලවේගයේ කරුණාරත්න පරණවිතානගේ නම මැතිවරණ කොමිෂන් සභාව විසින් ගැසට් කර තිබේ.
කරුණාරත්න පරණවිතාන මීට පෙර පාර්ලිමේන්තු ප්‍රතිසංස්කරණ හා ජනමාධ්‍ය නියෝජ්‍ය ඇමැතිවරයා ලෙසත්, නිපුණතා සංවර්ධන හා වෘත්තීය පුහුණු නියෝජ්‍ය ඇමැතිවරයා ලෙසත් කටයුතු කර ඇත.
ඊට පෙර ඔහු ජනමාධ්‍ය අමාත්‍යාංශයේ ලේකම්වරයා ලෙස කටයුතු කළේ, 2015 පාර්ලිමේන්තු මැතිවරණයේදී එජාපය ප්‍රමුඛ සන්ධානය හරහා මැතිවරණයට තරග කිරීම වෙනුවෙන් ඉල්ලා අස්වීමට පෙරය.
පාර්ලිමේන්තු මන්ත්‍රී තලතා අතුකෝරල පාර්ලිමේන්තු මන්ත්‍රී ධූරයෙන් ඉල්ලා අස්වීමත් සමඟ සභාවේ පුරප්පාඩුවක් ඇති වී ඇති බව පාර්ලිමේන්තුව සිකුරාදා (23) මැතිවරණ කොමිසමට දැනුම් දුන්නේය.
ඒ අනුව රත්නපුර දිස්ත්‍රික්කය නියෝජනය කරන පාර්ලිමේන්තු මන්ත්‍රීනී තලතා අතුකෝරල අගෝස්තු 21 වැනිදා සිට ක්‍රියාත්මක වන පරිදි පාර්ලිමේන්තු මන්ත්‍රී ධූරයෙන් ඉල්ලා අස්වීමේ ලිපිය භාරදුන් බව පාර්ලිමේන්තු මහලේකම් කුෂානි රෝහණදීර මැතිවරණ කොමිසමේ සභාපතිවරයා වෙත ලිඛිතව දන්වා තිබිණි.
