උතුරු තායිලන්තයේ චියැං මායි නගරයේ පිහිටි ජනප්රිය සංචාරක ගමනාන්තයක් වන ‘Tiger Kingdom’ සත්ත්ව උද්යානයේ සිටි ව්යාඝ්රයින් 72 දෙනෙකු සති දෙකක් වැනි ඉතා කෙටි කාලයක් තුළ හදිසියේ මියගොස් තිබේ. උද්යානයට අයත් මධ්යස්ථාන දෙකක රඳවා සිටි මෙම සතුන් පිරිස මියයාම සම්බන්ධයෙන් තායිලන්ත බලධාරීන් වහාම විමර්ශන ආරම්භ කර ඇති අතර, මෙය එරට වනජීවී සංරක්ෂණ ක්ෂේත්රයේ දැඩි කතාබහට ලක්වූ සිදුවීමක් බවට පත්ව ඇත.
තායිලන්ත ජාතික පශු සම්පත් දෙපාර්තමේන්තුව සිදුකළ මූලික පරීක්ෂණවලට අනුව, මෙම මරණවලට හේතුව වී ඇත්තේ Canine Distemper Virus (CDV) නම් අතිශය බෝවන සුළු වෛරසයයි. සාමාන්යයෙන් සුනඛයන් අතර පැතිරෙන මෙම වෛරසය ව්යාඝ්රයින් වැනි බළල් පවුලේ විශාල සතුන්ට වැළඳුණු විට ඔවුන්ගේ ශ්වසන, ආමාශ ආන්ත්රික සහ ස්නායු පද්ධතීන්ට දැඩි හානි පමුණුවමින් මාරාන්තික බලපෑම් ඇති කරයි. සතුන් රෝගී වී ඇති බව හඳුනාගන්නා විටත් රෝගය උත්සන්න වී තිබීම නිසා ඔවුන් බේරා ගැනීමට නොහැකි වූ බව බලධාරීන් ප්රකාශ කර ඇත.
මෙම ව්යසනකාරී තත්ත්වය හේතුවෙන් Tiger Kingdom උද්යානය සති දෙකක කාලයකට තාවකාලිකව වසා දමා ඇති අතර, පරිශ්රය සම්පූර්ණයෙන්ම විෂබීජහරණය කිරීමට පියවර ගෙන තිබේ. මියගිය සතුන්ගේ දේහයන් සෞඛ්යාරක්ෂිතව ආදාහනය කර මිහිදන් කර ඇති අතර, ඉතිරිව සිටින සතුන් 160කට අධික පිරිසගේ ආරක්ෂාව තහවුරු කිරීම සඳහා දැඩි සෞඛ්ය රීති ක්රියාත්මක කර ඇත. සංචාරකයින්ට ව්යාඝ්රයින් සමඟ සමීපව කටයුතු කිරීමට ඉඩ සැලසූ මෙවැනි උද්යානවල සතුන්ගේ සෞඛ්ය ආරක්ෂාව පිළිබඳව මේ සමඟ යළිත් ලෝක අවධානය යොමු වී තිබේ.
