ඉදිරි මාස දෙකහමාරකට ප්‍රමාණවත් ඉන්ධන සංචිත පවතින බව බලශක්ති අමාත්‍ය කුමාර ජයකොඩි මහතා පවසා සිටිනවා.
රජයේ ප්‍රවෘත්ති දෙපාර්තමේන්තුවේදී පැවති ප්‍රවෘත්ති සාකච්ඡාවකදී ඔහු පැවසුවේ, ඉන්ධන හිඟයක් ඇතිවනු ඇතැයි යන බියෙන් පාරිභෝගික ජනතාව අනවශ්‍ය ලෙස ඉන්ධන තොග රැස්කිරීමෙන් වැළකී සිටිය යුතු බවයි.
“මේ වන විට රට තුළ 2025 අගෝස්තු මාසය දක්වා අවශ්‍ය ඉන්ධන තොග පවතිනවා. සැපයුම්කරුවන්ගෙන් ඇණවුම් කරන ලද ඉන්ධන තොග ලැබෙමින් තිබෙනවා. ටෙන්ඩර් කැඳවා කොන්ත්‍රාත් ගිවිසුම් අත්සන් කර ඇති අතර, ඒවා නිසි පරිදි ක්‍රියාත්මක වෙමින් පවතිනවා. සැපයුම්කරුවන්ගෙන් ඉන්ධන සැපයීමේ බාධාවක් හෝ අඩාල වීමක් ගැන කිසිදු දැනුම්දීමක් අපට ලැබී නැහැ, ශ්‍රී ලංකාවට ලැබෙන බොරතෙල් හා පිරිපහදු කළ ඉන්ධනවලින් 95%කට ආසන්න ප්‍රමාණයක් සිංගප්පූරුව, මැලේසියාව, ඉන්දියාව වැනි යුදමය කලාපයෙන් පිටත රටවලින් ලැබෙනවා. එමනිසා, ඉන්ධන සැපයුමේ බාධාවක් ඇතිවීමට ඉඩක් නැහැ. රජයක් ලෙස අපි වගකීමෙන් ප්‍රකාශ කරනවා, කිසිදු ඉන්ධන හිඟයක් ඇති නොවන බව” යනුවෙන් අමාත්‍යවරයා පැවසීය.
සපුගස්කන්ද තෙල් පිරිපහදුවේ 2025 දෙසැම්බර් දක්වා බොරතෙල් සංචිත පවතින බවත්, වගකිව යුතු රජයක් ලෙස පූර්ව සූදානමකින් කටයුතු කරන බවත් ඔහු සඳහන් කළේය.
