ප්‍රවාහන සහ මහාමාර්ග නියෝජ්‍ය අමාත්‍ය වෛද්‍ය ප්‍රසන්න ගුණසේන මහතා පවසන්නේ, දුම්රිය ධාවනය ප්‍රමාද වීම සහ දුම්රිය වාර අවලංගු වීම වැළැක්වීම සඳහා දෛනිකව යොදා ගන්නා දුම්රිය එන්ජින් ප්‍රමාණය ඉහළ නැංවීමට රජය කටයුතු කරන බවයි.
ඇල්ල ප්‍රදේශයේ සංචාරයක නිරතව සිටිමින් ඔහු මේ බව සඳහන් කළේය.
දුම්රිය සේවයේ ගුණාත්මකභාවය ඉහළ නැංවීමේ අවශ්‍යතාවය අවධාරණය කරමින්, නියෝජ්‍ය අමාත්‍යවරයා පැහැදිලි කළේ, “මොකක් හරි කියන්න කලින් ඉලෙක්ට්‍රික් දුම්රිය ගේන්න කලින්, ලංකාවේ දුම්රිය වාර කැන්සල් වීම නවත්තන්න ඕනේ. දෛනිකව දුම්රිය වාර 217ක් 220ක් වගේ ධාවනය . පසුගිය කාලයේ එයින් 17ක් 18ක් 20ක් වගේ කැන්සල් වුණා. අපි පුළුවන් තරම් බලන්න ඕනේ කැන්සල් වීම නතර කරන්න. ඒ සඳහා දුම්රිය එන්ජිම් ධාවන මට්ටමේ තියා ගන්න ඕනේ” යනුවෙන් ඔහු පැහැදිලි කළේය.
සාමාන්‍යයෙන් දෛනික ධාවනය සඳහා ශ්‍රී ලංකාවට දුම්රිය එන්ජින් 60ක් 70ක් අවශ්‍ය වන අතර, පසුගිය කාලයේ මෙම සංඛ්‍යාව 45ක් 50ක් පමණක් සීමා වී තිබූ බව ඔහු සඳහන් කළේය. මෙම අඩුපාඩුව ඉහළ නැංවීම සඳහා රජය කටයුතු කරමින් සිටින අතර, පෙබරවාරි මාසය අවසන් වන විට දෛනික ධාවනය සඳහා යොදා ගන්නා එන්ජින් ප්‍රමාණය 60කට වඩා වැඩි කිරීමට සමත් වී ඇති බවත්, දුම්රිය වාර කැන්සල් වීමේ ප්‍රමාණය අඩු කිරීමට ද අවශ්‍ය පියවර ගෙන ඇති බවත් ඔහු පැහැදිලි කළේය.
ශ්‍රී ලංකාවේ දුම්රිය සේවයේ වර්තමාන තත්ත්වය පිළිබඳව ඔහු සඳහන් කරමින්, “ලංකාවේ ධාවනය වන දුම්රිය වලින් 52%ක් පමණක් දෛනිකව නියමිත වේලාවට ධාවනය වේ. 17%ක් විනාඩි 10කට වඩා ප්‍රමාද වී ධාවනය වන අතර, 10%ක් පැය භාගයකට වඩා ප්‍රමාද වී යනවා. මේ සේවයේ ගුණාත්මකභාවය වැඩි කරන්න නම්, දුම්රිය නියමිත වේලාවට ධාවනය කිරීම අත්‍යවශ්‍යයි. ඒ සඳහා අපි අවධානය යොමු කරලා තියෙනවා” යනුවෙන් ඔහු පැහැදිලි කළේය.
මෙම පියවර ඔස්සේ දුම්රිය සේවයේ කාර්යක්ෂමතාවය සහ ගුණාත්මකභාවය ඉහළ නැංවීමට රජය කටයුතු කරන බවත්, මෙය ජනතාවගේ ජීවිතය පහසු කිරීමට උපකාරී වනු ඇති බවත් නියෝජ්‍ය අමාත්‍යවරයා අවධාරණය කළේය.
