පොලිස්පති දේශබන්දු තෙන්නකෝන්ට විරුද්ධව රජය විසින් ඉදිරිපත් කරන ඕනෑම යෝජනාවකට සමඟි ජන බලවේගයේ සහය ද හිමි වන බව විපක්ෂ නායක සජිත් ප්‍රේමදාස මහතා පැවසීය.
විපක්ෂනායකවරයා පවසා සිටියේ දේශබන්දු තෙන්නකෝන් මහතා පොලිස්පති කරනු ලැබුවෙන් ආණ්ඩුක්‍රම ව්‍යවස්ථාව උල්ලංඝනය කරමින් බවත් මෙම පත් කිරීමට හිටපු ජනාධිපතිවරයා මෙන්ම කථානායකවරයාද වගකිව යුතු බවත්ය.
එමෙන්ම ඒදවස්වල දේශබන්දු තෙන්නකෝන් ව්‍යවස්ථාව කඩකර උත්තරීතර නීතිය පාගා දමා අනීතිකව පත් කරන විට අද කෑ ගහන අය එදා නිශ්ශබ්දව සිටි අතර ප්‍රමාද වී හෝ මෙවැනි විශ්වාසභංගයක් ගෙන ඒම ගැන සතුටු වෙන බවත් ඔහු පැවසීය.
ඔහු මේ බව කියා සිටියේ ඉදිරි පළාත් පාලන මැතිවරණය වෙනුවෙන් සමගි ජන බලවේගයේ මහනුවර දිස්ත්‍රික් අපේක්ෂකයන් වෙනුවෙන් අද (25) පැවැති වැඩමුළුවකදී අදහස් දක්වමිනි.
