නයිජීරියාවේ සමාජ මාධ්ය අන්තර්ජාල නිර්මාණකරුවන්ගේ (Content Creators) ක්ෂේත්රය මේ වන විට දැවැන්ත වර්ධනයක් අත්කරගෙන තිබේ. 2026 අප්රිකානු නිර්මාණකරුවන්ගේ ආර්ථික වාර්තාවට අනුව මෙම ක්ෂේත්රය ඩොලර් බිලියන 3.1 ක අගයක පවතින අතර එය 2030 වන විට ඩොලර් බිලියන 17.8 ක් දක්වා හය ගුණයකින් වර්ධනය වනු ඇතැයි අපේක්ෂා කෙරේ. කෙසේ වුවද මෙම ක්ෂේත්රයේ ජනප්රියත්වය ඉහළ ගියද එමගින් උපයන ආදායම තවමත් සතුටුදායක මට්ටමක නොමැති බව වාර්තා වේ.
නයිජීරියාවේ බ්රොඩා ෂැගී (Broda Shaggi) වැනි නිර්මාණකරුවන් මිලියන සංඛ්යාත අනුගාමික පිරිසක් දිනාගෙන සිටියද අප්රිකාවේ නිර්මාණකරුවන්ගෙන් අඩකට වඩා වැඩි පිරිසක් මසකට උපයන්නේ ඩොලර් 100 කට වඩා අඩු මුදලකි. මෙයට ප්රධාන හේතුව වන්නේ අනෙකුත් රටවලට සාපේක්ෂව අප්රිකානු කලාපය තුළ සමාජ මාධ්ය වේදිකාවල දැන්වීම් මගින් ලැබෙන ආදායම අඩු මට්ටමක පැවතීමයි. මේ හේතුවෙන් බොහෝ නිර්මාණකරුවන්ට සිය ජීවනෝපාය සඳහා පෞද්ගලික වෙළෙඳ නාම සමඟ ඇති කරගන්නා අනුග්රාහක සබඳතා මත යැපීමට සිදු වී ඇත.
ක්ෂේත්රයේ පවතින මෙම ගැටලුවලට පිළියම් ලෙස රජයෙන් බදු සහන සහ ආයෝජන ලබා දිය යුතු බවට නිර්මාණකරුවෝ ඉල්ලා සිටිති. විශේෂයෙන්ම එක්සත් අරාබි එමීර් රාජ්යයේ ක්රියාත්මක වන වසර 10 ක ගෝල්ඩන් වීසා (Golden Visa) වැනි ප්රතිපත්ති හරහා නිර්මාණකරුවන්ට බදු රහිතව වැඩ කිරීමට අවස්ථාව ලබා දිය යුතු බව ආර්ථික විශ්ලේෂකයන්ගේ මතයයි. තවද අන්තර්ජාල දත්ත පිරිවැය අඩු කිරීම සහ බුද්ධිමය දේපළ සොරකම් කිරීම වැළැක්වීමට විධිමත් නීති සකස් කිරීම ක්ෂේත්රයේ දියුණුවට අත්යවශ්ය වේ.
නයිජීරියානු රජය සිය ආර්ථිකය තෙල් මත පමණක් යැපීම නතර කර නිර්මාණාත්මක ආර්ථිකය හරහා ආදායම් උපයා ගැනීමට බලාපොරොත්තු වේ. කෙසේ වුවද විවිධ නිර්මාණකරුවන්ගේ සංගම් පවතින බැවින් රජයට සෘජුව ගනුදෙනු කිරීමට එක් පොදු හඬක් නොමැති වීම විශාල බාධාවක් වී ඇත. අන්තර්ජාල නිර්මාණකරුවන් පවසන්නේ තමන්ට බදු පැනවීමට පෙර තම වෘත්තීය කටයුතු නිදහසේ කරගෙන යාමට අවශ්ය යටිතල පහසුකම් සලසා දීම රජයේ වගකීමක් බවයි.
