විදුලිබල ක්‍ෂෙත‍්‍රයේ මෙන්ම නාගරික සංවර්ධන ක්‍ෂෙත‍්‍රයේ ද ජාති බේදයකින් තොරව සැමට සේවය ඉටුකළ බව මහානගර අමාත්‍ය පාඨලී චම්පික රණවක මහතා පවසයි. අමාත්‍යවරයා මේ බව පැවසුවේ, මහානගර අමාත්‍යාංශයේ සුඛිත පුරවර වැඩසටහනේ ප‍්‍රතිපාදන මගින්, නාගරික සංවර්ධන අධිකාරියේ සැලසුම් සහ අධික්ෂණය යටතේ රුපියල් මිලියන 65 ක වියදමින් ඉදිකළ මඩකලපුව පුද්ගලික බස්නැවතුම්පල විවෘත කිරීමේ අවස්ථාවට සහභාගී වෙමිනි.
එහිදී අදහස් දැක්වූ අමාත්‍යවරයා, “අපි ශ‍්‍රී මේ වසරේ මුල් භාගයේදී ලංකාවේ ජාතික භෞතික සැලසුම සකස් කර අවසන් කළා. එහිදී අපි ආර්ථික කොරිඩෝ 4 ක් හඳුනාගත්තා, එකක් තමයි කොළඹ කුරුණෑගල හරහා ති‍්‍රකුණාමලය දක්වා දිව යන නාගරික කොරිඩෝව. අනෙක ගාල්ලේ සිට තිස්සමහාරාමයටත්, තෙවන එක යාපනය සිට කිලිනොච්චියටත්, හතරවෙනි එක වාලච්චේනයේ සිට මඩ කලපුවටත්, එතනින් අම්පාරටත් තිබෙන එම නාගරික සංවර්ධන කොරිඩෝව. එතනදී අපි ප‍්‍රධාන උපාය මර්ගික නගර දෙකක් හැටියට මඩකලපුවත් අම්පාරත් හඳුනාගෙන තිබෙනවා. ඒ නිසා අපි විදේශ සම්පත් දෙපාර්තමේන්තුවට දැනුම් දී තිබෙනවා මේ නගර විධිමත්ව ගොඩ නගා ගන්න විදේශ අරමුදල් අවශ්‍යයි කියලා. යාපනය, අනුරාධපුරය, මහනුවර සහ ගාල්ල. අපි ඉදිරියේදී බලාපොරොත්තු වෙනවා. කුරුණෑගල, දඹුල්ල, ති‍්‍රකුණාමලය, මඩකලපුව අම්පාර, මාතර හා රත්නපුර නගර ඒකට ඇතුල් කරන්න.
නගරාධිපතිතුමන් සඳහන් කළා වගේ අපගේ කිසිම භේදයක් නැහැ සංවර්ධනයේදී. නගරාධිපතිතුමන්, දිසාපතිතුමන්, මන්ත‍්‍රීතුමන්ලා ඇතුළු සංවර්ධන සභාව විසින් අපගේ නාගරික සංවර්ධන අධිකාරිය සමග සාකච්ඡා කර මඩකලපුව නගරයේ දියුණුව සඳහා අත්‍යාවශ්‍ය සංවර්ධන යෝජනා හඳුනාගෙන ඉදිරි සති කිහිපය ඇතුළත අපට දැනුම් දෙන ලෙස ඉල්ලා සිටිනවා. අප 2009 යුධ ගැටුම් අවසන් වූ වහාම විදුලි බල ඇමතිවරයා හැටියට මම මඩකලපු දිස්ත‍්‍රික්කයට ආවා. ත‍්‍රිකුණාමලයේ විශාල විදුලි බල මධ්‍යස්ථානයක් හැදුවා. වාලච්චේනයේ, මඩකලපුවේ විදුලි බල මධ්‍යස්ථාන ඇති කළා. මඩකලපු දිස්ත‍්‍රික්කයේ සෑම ගමක් වෙතම විදුලි ගෙන ගියා. එමගින් විශේෂයෙන්ම අපේ දූ දරුවන්ට විශාල ශක්තියක් ලබාදුන්නා. එම වකවානුවේ ලංකා විදුලි බල මණ්ඩලයේ සියළු රැකියා, වෙනස් වෙනත් දිස්ත‍්‍රිත්කවලට නෙමෙයි මේ මඩකලපුව දිස්ත‍්‍රික්කයෝ අයට විතරක් ලබාදුන්නා. ඒ ගැන ඔබට දැනගන්න පුළුවන් ඩී.ජී.එම්. ඔෆිස් එකට ගියහම.
අපි යාපනයට සියළු පහසුකම් සහිත බස්නැවතුම්පලක් ඉඳිකරමින් පවතිනවා. ඒ වගේම අපි බහුවිධ ප‍්‍රවාහන මධ්‍යස්ථානයක්, නගර ශාලාවක් ඉදිකරන්න බලාපොරොත්තු වෙනවා. අපේ නගරාධිපතිතුමාගේ ඉල්ලීමක් තිබෙනවා මඩකලපුවටත් සියළු පහසුකම් සහිත නගර ශාලාවක් ඉදිකර දෙන ලෙස. ඒ සඳහා අපේ නාගරික සංවර්ධන අධිකාරිය කැපවෙනවා. ඔබතුමාලත් ඔබලාගේ දේශපාලන අධිකාරිය මාර්ගයෙන් ජනාධිපතිතුමාට, අගමැතිතුමාට, විශේෂයෙන් මුදල් ඇමතිතුමාට පණිවිඩය ලබාදෙන ලෙස.
අපේ පැරණි දෙමළ කියමනක සඳහන් වෙන දෙයක් අපගේ වැදගත් රාජ්‍ය නිලධාරියෙක් මම පේදුරුතුඩුවේ ගිය වෙලාවක මට පැවසුවා. එම කියමන මට දෙමලෙන් සඳහන් කරන්න මතක නැහැ. සිංහලෙන් සඳහන් කරනවා නම්, මුහුදේ තිබෙන ලූනුයි, කන්දේ තිබෙන දෙහියි අතර සම්බන්ධයක් නැහැ. හැබැයි ලූනුයි දෙහියි එකතු උනහම ලූනු දෙහි නමැති රසවත් ආහාරය හැදෙනවා. ඒ වගේම කන්දේ, මහනුවර ඉන්න සිංහලයොයි මඩකලපුවේ ඉන්න දෙමළ ජාතිකයොයි අතර ලොකු සංස්කෘතික සම්බන්ධයක් නොතිබ්බත් දෙගොල්ලෝ එකට එකතු උනාහම ශ‍්‍රී ලංකා මාතාව නමැති රසවත් ජාතිය ගොඩනගාගන්න පුළුවන් වෙයි. ඒ සඳහා අපි සියළු දෙනාම කැපවීමෙන් කටයුතු කරමු යැයි මහානගර අමාත්‍ය පාඨලී චම්පික රණවක මහතා වැඩිදුරටත් සඳහන් කළේ ය.
