ජාතික ගොඩනැඟිලි පර්යේෂණ සංවිධානය පවසන පරිදි, මේ වනවිට ශ්රී ලංකාවේ දිස්ත්රික්ක 14ක නායයෑම් අවදානම හඳුනාගෙන තිබෙනවා.
රජයේ ප්රවෘත්ති දෙපාර්තමේන්තුවේ අද (12) පැවති පවතින කාලගුණ තත්ත්වය හා ආපදා ප්රවණතා පිළිබඳ මාධ්ය හමුවේදී මෙරට සමස්ත භූමියෙන් සති 30%කට අධික ප්රමාණයක් නායයෑම් සිදුවන ස්ථාන ලෙස හඳුනාගෙන ඇති බව සංවිධානයේ ජ්යෙෂ්ඨ භූ විද්යාඥ ආචාර්ය වසන්ත සේනාධීර මහතා පවසනවා.
ඒ අනුව මෙම අවදානම් ප්රදේශවල ජීවත් වන ජනගහනය සම්පූර්ණ ජනගහනයෙන් 34%ක් බවත්, එම ප්රදේශ ප්රමාණය වර්ග කිලෝමීටර් 20,000ක පමණ පතාහ බවත් ඔහු සඳහන් කර සිටියා.
දිට්වා සුළි කුණාටුව හේතුවෙන් ඇති වූ අධික වර්ෂා තත්ත්වය අනුව නායයෑම් අවදානම් පරීක්ෂා කිරීම සඳහා ලැබී ඇති ඉල්ලීම් 2,710ක් ගණන් වන අතර, ඒවගෙන් 589ක් මේ වනවිට පරීක්ෂා කළ බවත් ආචාර්ය සේනාධීර මහතා පවසනවා.
චන්ද්රිකා ඡායාරූප සහ අනෙකුත් තොරතුරු මත මීටර් 10ට වැඩි පස් කඳු කඩා වැටීම් 1,241ක් හඳුනාගෙන ඇති අතර, නිවාසවලට බලපෑම් නොමැති නායයෑම් 919ක් සහ නිවාසවලට බලපෑම් වූ 322ක් වාර්තා වී ඇති බවද ඔහු පැවසුවා.
ඇතැම් අවස්ථාවල අනවසර ගොඩනැඟිලි හෝ අනතුරුදායක ස්ථානවල ජීවත් වන පුද්ගලයින්, ගොඩනැඟිලි පර්යේෂණ සංවිධානයේ උපදෙස් දැඩි ලෙස පිළිපැදිය යුතු බවයි ඔහු අවධාරණය කර සිටියේ.
පස් කන්ද කඩා වැටීම් හේතුවෙන් බොහෝ ජීවිත අහිමිවී ඇති බවත්, එබැවින් මෙවැනි අවදානම් පිළිබඳ වැඩි අවධානයක් ගන්නා ලෙසත් ආචාර්ය සේනාධීර මහතා ජනතාවගෙන් ඉල්ලා සිටියි.
