එළඹෙන සිංහල හින්දු අලුත් අවුරුද්ද නිමිත්තෙන් ආහාර පාන නිෂ්පාදන අංශයේ වැඩිවීමක් ඇතුලු නිෂ්පාදන අංශයේ ශ්‍රී ලංකා ගැණුම්කරුවන්ගේ දර්ශකය පෙබරවාරි මාසයේදී ඉහළ ගොස් ඇත.
ඒ අනුව නිෂ්පාදන කටයුතු වල තවදුරටත් වර්ධනයක් පෙන්නුම් කරමින් නිෂ්පාදන අංශයේ ශ්‍රී ලංකා ගැනුම් කළමණාකරුවන්ගේ දර්ශකය 2025 පෙබරවාරි මාසයේදී 56.8ක දර්ශක අගයක් වාර්තා කොට තිබෙන බව ශ්‍රී ලංකා මහ බැංකුව ප්‍රකාශ කරයි.
නිෂාපාදන අංශයේ මෙම වර්ධනය සඳහා සියලුම උප දර්ශක ධනාත්මක ලෙස දායකවී තිබීම විශේෂත්වයකි.
විශේෂයෙන් ආහාර පාන නිෂ්පාදන අංශයෙහි නියුතු බොහෝ සමාගම් එළඹෙන උත්සව සමය සඳහා සූදානම් වෙමින් සිටීම නව ඇණවුම් සහ නිෂ්පාදන උප දර්ශකවල වර්ධනයට ප්‍රධාන වශයෙන් හේතු විය.
ඉහළ යන ඉල්ලුමට මුහුණ දීමට සරිලන පරිදි සේවා නියුක්තිය සහ තොග මිලදී ගැනුම් ද ඉහළ ගියේය. මේ අතර, සැපයුම්කරුවන් වඩාත් කාර්ය බහුල වීම පිළිබිඹු කරමින් පෙබරවාරි මාසය තුළ දී ඇණවුමක් සැපයීමට සැපයුම්කරුවන්ට ගතවන කාලය තවදුරටත් ඉහළ ගියේය.
2024 වසරේදී ආර්ථිකයේ 5%ක වර්ධනයක්
2024 සඳහා ශ්‍රී ලංකා ආර්ථිකයේ 5% ක සමස්ත වර්ධනයක් වාර්තා කර ඇති බව ජනලේඛන හා සංඛ්‍යාලේඛන දෙපාර්තමේන්තුව පවසයි.
2024 සිව්වන කාර්තුව සඳහා ජාතික නිෂ්පාදන ඇස්තමේන්තුව ඉදිරිපත් කරමින් එම දෙපාර්තමේන්තුව මේ බව සඳහන් කර තිබේ.
අලුත් වූ සාර්ව ආර්ථික ස්ථාවරත්වය මධ්‍යයේ මෙලෙස ශක්තිමත් පරිවර්තනයක් වාර්තා කරමින් ඇති බවද එහි වැඩිදුරටත් දැක්වෙයි.
සටහන – ජේ.මුණසිංහ
