ඉශ්රායල අග්රාමාත්ය බෙන්ජමින් නෙතන්යාහු මෙම සතියේ වොෂින්ටන් නුවර සිදු කිරීමට නියමිත සංචාරයට පෙර, අත්පත් කරගෙන සිටින බටහිර ඉවුරේ (West Bank) සිය පාලනය තවදුරටත් දැඩි කිරීම සඳහා ඉශ්රායලය පුළුල් පියවර මාලාවක් ප්රකාශයට පත් කර තිබේ. ඉරිදා (08) රැස්වූ ඉශ්රායල ආරක්ෂක කැබිනට් මණ්ඩලය විසින් ජනාවාස ව්යාප්ත කිරීම සඳහා ඉඩම් මිලදී ගැනීමේ බලය රජයට ලබා දෙන නව නීති සම්මත කළ අතර, මෙය බටහිර ඉවුරේ නීතිමය සහ සිවිල් යථාර්ථය මූලික වශයෙන් වෙනස් කරනු ඇති බව එරට අන්ත දක්ෂිණාංශික මුදල් අමාත්ය බෙස්ලෙල් ස්මොට්රිච් පවසයි.
මෙම නව පියවර යටතේ, ඔස්ලෝ ගිවිසුම මගින් පලස්තීන ආරක්ෂක පාලනයට නතු කර තිබූ බටහිර ඉවුරේ ‘A’ සහ ‘B’ කලාප තුළ ද සිය බලාත්මක කිරීමේ බලතල පුළුල් කිරීමට ඉශ්රායලය තීරණය කර ඇත. මීට අමතරව හෙබ්රොන් (Hebron) නගරයේ පදිංචි යුදෙව් සුළුතරයට පලස්තීන නගර සභාවේ උපදෙස් විමසීමකින් තොරව ජනාවාස ඉදිකිරීම් සහ නාගරික කටයුතු සිදු කිරීමට ද අවසර ලබා දී තිබේ. පලස්තීන රාජ්යයක් පිළිබඳ සංකල්පය සහමුලින්ම තුරන් කිරීම තම අරමුණ බව ස්මොට්රිච් අමාත්යවරයා මෙහිදී ප්රසිද්ධියේම ප්රකාශ කළේය.
පලස්තීන අධිකාරිය (PA) මෙම ක්රියාව දැඩි ලෙස හෙළා දකිමින් ප්රකාශ කළේ මෙය පලස්තීන ඉඩම් ඈඳාගැනීමේ සහ ජනතාව අවතැන් කිරීමේ සැලසුමක ප්රායෝගික ක්රියාත්මක වීමක් බවයි. ඇමරිකානු ජනාධිපති ඩොනල්ඩ් ට්රම්ප් මීට පෙර පවසා තිබුණේ බටහිර ඉවුර ඈඳාගැනීමට තමන් ඉඩ නොදෙන බව වුවද, ඉශ්රායල රජය විසින් ජාත්යන්තර නීතිය උල්ලංඝනය කරමින් ගනු ලබන මෙම පියවර හරහා පලස්තීන රාජ්යයක් බිහිවීම අසන්නක් කිරීමට උත්සාහ කරන බව විචාරකයෝ පෙන්වා දෙති.
