දැනට ක්රියාත්මක QR ඉන්ධන කෝටා ක්රමය යටතේ වෛද්යවරුන්ට වෙන් කර ඇති ඉන්ධන ප්රමාණය ඔවුන්ගේ රාජකාරි කටයුතු සඳහා කිසිසේත්ම ප්රමාණවත් නොවන බව රජයේ වෛද්ය නිලධාරීන්ගේ සංගමය (GMOA) පවසයි. මෙම ගැටලුව කඩිනමින් විසඳීමට රජය පියවර නොගතහොත් රටේ සෞඛ්ය සේවාවන් පවත්වාගෙන යාමට දැඩි බාධා එල්ල විය හැකි බවට ද එම සංගමය අද (15) විශේෂ ප්රකාශයක් නිකුත් කරමින් අවධාරණය කළේය.
රජයේ රෝහල් පද්ධතිය වසරේ සෑම දිනකම පැය 24 පුරාම ක්රියාත්මක වන අතර, වෛද්යවරුන්ට සිය සාමාන්ය රාජකාරිවලට අමතරව හදිසි ඇමතුම් (On-call) සහ හදිසි ප්රතිකාර සේවා සඳහා නිරන්තරයෙන් ගමන් කිරීමට සිදු වේ. ඇතැම් රජයේ උසස් නිලධාරීන්ට මෙන් වෛද්යවරුන්ට රජයේ වාහන හෝ වෙනම ඉන්ධන දීමනා හිමි නොවන අතර, ඔවුන් සිය පෞද්ගලික වාහනවලින් සේවයට වාර්තා කළ යුතු බව සංගමය පෙන්වා දෙයි. විශේෂයෙන්ම තම නිවෙස්වලින් බැහැරව දුර බැහැර ප්රදේශවල සේවය කරන විශේෂඥ වෛද්යවරුන්ට සහ වෛද්ය පරිපාලකයින්ට පවතින ඉන්ධන සීමාවන් හමුවේ රෝහල වෙත පැමිණීමට පවා නොහැකි තත්ත්වයක් උදා වී ඇති බව GMOA සඳහන් කරයි.
එබැවින්, සෞඛ්ය සේවකයින් මුහුණ දෙන මෙම ප්රායෝගික ගැටලු හඳුනාගෙන, වෛද්යවරුන් ඇතුළු සෞඛ්ය කාර්ය මණ්ඩලය සඳහා වන ඉන්ධන කෝටාව වහාම සංශෝධනය කරන ලෙස එම සංගමය රජයෙන් ඉල්ලා සිටියි. මහජනතාවගේ සෞඛ්ය අයිතිය සුරක්ෂිත කිරීම වෙනුවෙන් මෙම ප්රශ්නය ජාතික ප්රමුඛතාවක් ලෙස සලකා මැදිහත් වන ලෙස ද ඔවුන් ජනාධිපතිවරයාගෙන් වැඩිදුරටත් ඉල්ලා සිටියි.
