ශ්රී ලංකාවේ බස්නාහිර, සබරගමුව, දකුණු සහ වයඹ පළාත්වල මෙන්ම මොනරාගල සහ මන්නාරම දිස්ත්රික්කවල ඇතැම් ප්රදේශවල අද (මාර්තු 12) උණුසුම් දර්ශකය ඉහළ මට්ටමක පවතින බව කාලගුණ විද්යා දෙපාර්තමේන්තුව නිවේදනය කරයි. මෙම ප්රදේශවල මිනිස් සිරුරට දැනෙන උණුසුම සෙල්සියස් අංශක 39 ත් 45 ත් අතර අගයක පවතිනු ඇතැයි ගණන් බලා ඇති අතර, මෙය සෞඛ්යමය වශයෙන් “අවධානය යොමුකළ යුතු” (Caution) මට්ටමක් ලෙස හඳුන්වා දී ඇත.
මෙවැනි ඉහළ උණුසුම් තත්ත්වයක් යටතේ දීර්ඝ වේලාවක් එළිමහනේ රැඳී සිටීම හෝ දැඩි වෙහෙසකාරී කටයුතුවල නිරත වීම නිසා ශරීරයේ තෙහෙට්ටු ගතිය ඇති විය හැකිය. එසේම විජලනය සහ සිරුරෙන් ලවණ වර්ග ඉවත් වීම හේතුවෙන් මස්පිඩු පෙරළීම වැනි තත්ත්වයන් ඇති වීමේ අවදානමක් පවතින බව කාලගුණ බලධාරීන් පෙන්වා දෙයි. විශේෂයෙන්ම ළමයින්, වැඩිහිටියන් සහ නිදන්ගත රෝගවලින් පෙළෙන පුද්ගලයන් මේ පිළිබඳව වැඩි අවධානයක් යොමු කිරීම අත්යවශ්ය වේ.
පවතින උණුසුම් කාලගුණයෙන් ආරක්ෂා වීම සඳහා ප්රමාණවත් පරිදි ජලය පානය කිරීම, සෙවන ඇති ස්ථානවල රැඳී සිටීම සහ ලා පැහැති සැහැල්ලු ඇඳුම් භාවිත කිරීම සුදුසුය. මීට පෙර වාර්තා වූ වැසි සහිත තත්ත්වය මධ්යයේ වුවද, දිවයිනේ බොහෝ ප්රදේශවල දහවල් කාලයේදී පවතින මෙම අධික උණුසුම දෛනික ජීවිතයට සෘජු බලපෑමක් එල්ල කරමින් පවතී.
