අධ්‍යාපන පොදු සහතික පත්‍ර උසස් පෙළ විභාගයේ ආර්ථික විද්‍යාව ප්‍රශ්න පත්‍රය පිටවී ඇති බවට සමාජ මාධ්‍ය තුළ පලවන පුවත් සම්බන්ධයෙන් පරීක්ෂණයක් ආරම්භ කිරීමට අපරාධ පරීක්ෂණ දෙපාර්තමේන්තුවට පවරා ඇති බව අද (25) පැවති කැබිනට් තීරණ දැනුම්දීමේ මාධ්‍ය හමුවේදී අමාත්‍ය නලින් ජයතිස්ස මහතා පැවසුවේය.
ඔහු වැඩිදුර සඳහන් කළේ, ලැබුණු තොරතුරක් මත මෙම පරීක්ෂණය සිදු කරමින් ඇති බවයි.
ආර්ථික විද්‍යා ප්‍රශ්න පත්‍රය විභාගයට පෙර අනුමාන ප්‍රශ්න ලබාදීම හේතුවෙන් ප්‍රශ්න පත්‍රය පිටවී ඇතැයි සමාජ මාධ්‍ය තුළ දැඩි සේ කතා බහට ලක්ව තිබුණි.
මේ සම්බන්ධයෙන් විපක්ෂයේ මන්ත්‍රී චාමර සම්පත් බරපතල චෝදනාවක් එල්ල කර ඇති අතර, ප්‍රශ්න පත්‍ර නුගේගොඩ ප්‍රසිද්ධ උපකාරක පන්තියක් හරහා කාන්දු වී ඇති බව කියා සිටී.
පාර්ලිමේන්තුවේදී කතා කරමින් මන්ත්‍රීවරයා චෝදනා කළේ විභාග ප්‍රශ්න පත්‍රය ප්‍රසිද්ධ උපකාරක පන්තියකින් ආරම්භ වී ඇති බවත්, සැබෑ උසස් පෙළ ආර්ථික විද්‍යා ප්‍රශ්න පත්‍රයේ සැලකිය යුතු ප්‍රශ්න සංඛ්‍යාවක් ආයතනය විසින් කලින් බෙදා හරින ලද ව්‍යාජ ප්‍රශ්න පත්‍රවලින් ලබාගත් ප්‍රශ්නවලට ගැලපෙන බවත්ය.
