විද්‍යුත් වීසා ක්‍රමය පුද්ගලික සමාගම් දෙකකට පැවරීමේ කැබිනට් තීරණය අත්හිටුවීමට දුන් නියෝගය ක්‍රියාත්මක නොකළ
විද්‍යුත් වීසා ක්‍රමය යටතේ වීසා නිකුත්කිරීමට රජය ගෙන තිබූ තීරණය බලරහිත කරමින් ශ්‍රේෂ්ඨාධීකරණය විසින් නිකුත්කර තිබූ අතුරු තහනම් නියෝගය ඇතුළු නියෝග ක්‍රියාත්මක කිරීම පැහැරහැර තිබූ ආගමන විගමන පාලක ජනරාල් හර්ෂ ඉලුක්පිටිය මහතා ඔහුට එරෙහිව ගොනු කර ඇති අධිකරණයට අපහාස කිරීමේ චෝදනා සම්බන්ධයෙන් වූ නඩු තුන අවසන් වනතුරු රක්ෂිත බන්ධනාගාරගත කිරීමට ශ්‍රේෂ්ඨාධීකරණය ඊයේ (25 දා) පස්වරුවේ නියෝග කළේය.
ශ්‍රේෂ්ඨාධීකරණය විසින් පසුගිය 13වැනිදා නිකුත් කළ නියෝගය අනුව හර්ෂ ඉලුක්පිටිය මහතා ඊයේ (25 දා) ශ්‍රේෂ්ඨාධීකරණය හමුවේ පෙනි සිටියේය. පෙත්සම්කාර පාර්ශ්ව විසින් ශ්‍රේෂ්ඨාධිකරණයේ නියෝගය පරිදි අධිකරණයට අපහාස කිරීමේ චෝදනා කෙටුම්පත් තුන විවෘත අධිකරණය හමුවේදී ශ්‍රේෂ්ඨාධීකරණ ලේඛකාධිකාරිවරයා විසින් අත්සන් තැබීමෙන් අනතුරුව ඔහු විසින්ම එකී චෝදනා පත්‍ර ක්‍රියවා දී හර්ෂ ඉලුක්පිටිය මහතාට භාරදීම දුනි.
සිය සේවාදායකයා එකි චෝදනාවලට නිවැරදිකරු බව හර්ෂ ඉලුක්පිටිය මහතා වෙනුවෙන් පෙනි සිටි ජ්‍යෙෂ්ඨ ජනාධිපති නීතිඥ පායිස් මුස්තාපා මහතා හා මාකර් මුස්තාපා මහත්මිය විනිසුරු මඬුල්ලට පැවසූහ. ඉන් අනතුරුව විවෘත අධිකරණය හමුවට බන්ධනාගාර නිලධාරියකු කැඳවූ විනිසුරු මඬුල්ලේ සභාපති විනිසුරුවරයා ලෙස කටයුතු කළ ප්‍රීති පද්මන් සූරසේන මහතා වගඋත්තරකරුව විවෘත අධිකරණය තුළ රඳවා තබා ගන්නා ලෙසට නියෝග කළේය.
රටේ ඉහළම අධිකරණය විසින් ලබාදුන් නියෝග ක්‍රියාත්මක කිරීම පැහැරහැරීම ඉතාම බරපතළ කරුණක් බවත් නීතියේ ආධිපත්‍ය සුරැකීමේ වගකීම පැවරී ඇති තම අධිකරණයට එවැනි බරපතළ වැරදි සිදුකරන අවස්ථාවලදී නිහඬව සිටීමේ හැකියාවක් නොමැති බවත් පෙන්වා දුන් ප්‍රීති පද්මන් සූරසේන, කුමුදුනි වික්‍රමසිංහ හා අචල
වෙන්ගප්පුලි යන ත්‍රීපුද්ගල විනිසුරු මඬුල්ල විනාඩි 15කට නඩු කටයුතු අත්හිටුවා අධිකරණ ශාලාවෙන් පිට වූහ. විනිසුරු මඬුල්ල යළි රැස්වූ අවස්ථාවේදී කරුණු දැක්වූ ජනාධිපති නීතිඥ පායිස් මුස්තාපා මහතා හා මාකර් මුස්තාපා මහත්මිය සිය සේවාදායකයා හිතාමතාම අධිකරණය විසින් නිකුත්කර තිබූ වාරණ නියෝග ක්‍රියාත්මක කිරීම පැහැරහැරීමක් සිදුකර නොමැති බවත් තාක්ෂණික හේතුන් මත ඒවා ක්‍රියාත්මක කිරීමට ඇති අපහසුතා පිළිබඳව දිවුරුම් ප්‍රකාශයක් මගින් අධිකරණය දැනුම්වත් කර ඇති බවත් පැවසූහ.
එබැවින් ඔහු රක්ෂිත බන්ධනාගාරගත නොකර ඇපමත මුදාහරින ලෙසට ද වගඋත්තරකරුගේ නීතිඥවරු අධිකරණයෙන් ඉල්ලා සිටියහ. මෙම අවස්ථාවේදී නීතිපතිවරයා වෙනුවෙන් පෙනි සිටි අතිරේක සොලිසිටර් ජනරාල් විවේකා සිරිවර්ධන මහත්මිය සතුව තිබූ නඩු ගොනුවේ ඇතුළත් ලේඛනයක් පදනම් කරගෙන ජනාධිපති නීතිඥවරයා අධිකරණය හමුවේ කරුණු දැක්වීම ආරම්භ කළ අතර ජනාධිපති නීතිඥවරයා තම අධිකරණයට කරුණු දැක්වනුයේ නීතිපතිවරයා හෝ රජය වෙනුවෙන්ද නැතහොත් වගඋත්තරකරු වෙනුවෙන් දැයි සභාපති විනිසුරු විමසා සිටියේය.
සිය සේවාදායකයා අධිකරණය විසින් පසුගිය අගෝස්තු 2වැනිදා නිකුත් කළ අතුරු තහනම් නියෝග හතර අනුව කටයුතු කිරීමට සූදානම් බවත් ඒ සඳහා ප්‍රමාණවත් කාලයක් අවශ්‍ය බවත් ජනාධිපති නීතිඥ පායිස් මුස්තාපා මහතා විනිසුරු මඬුල්ලට පැවසීය. තම අධිකරණය විසින් එකී අතුරු තහනම් නියෝග නිකුත්කොට ඇත්තේ පෙත්සම්කාර පාර්ශ්වය මෙන්ම වගඋත්තරකාර පාර්ශ්වය ඇතුළු සියලු පාර්ශ්ව ඉදිරිපත් කළ කරුණු සලකා එය ජාතික ගැටලුවක් වන බව තේරුම් ගැනීමෙන් අනතුරුව වන්නේ යැයි සභාපති විනිසුරු ප්‍රීති පද්මන් සූරසේන මහතා එම අවස්ථාවේදී පැවසීය.
අධිකරණයේ නියෝගය ක්‍රියාත්මක කිරීම සඳහා මේ වනවිටත් අවශ්‍ය අංශ සමග සාකච්ඡා කොට අවසන් බව ද ජනාධිපති නීතිඥ පායිස් මුස්තාපා මහතා එහිදී විනිසුරු මඬුල්ලට පැවැසීය. අධිකරණය එකී අතුරු තහනම් නියෝග නිකුත්කොට මාස එකහමාරක කාලයක් ගතවන තුරුත් පළමුවන වගඋත්තරකාර හර්ෂ ඉලුක්පිටිය එකී නියෝග අනුව කටයුතු කිරීමට කිසිදු උත්සාහයක් දරා නොමැති බව පසුගිය 13වැනිදා අධිකරණය හමුවේ එම දෙපාර්තමේන්තුවේ පරිගණක අංශයේ අධ්‍යක්ෂවරයා ලබාදුන් සාක්ෂිය අනුවම පැහැදිලි වන්නේ යැයි පෙත්සම්කාර පාර්ශ්වය නියෝජනය කළ ජනාධිපති නීතිඥ එම්. ඒ. සුමන්තිරන් මහතා විනිසුරු මඬුල්ලට පැවසීය.
පසුගිය 13වැනිදා විනිසුරු මඬුල්ල විසින් අධිකරණය හමුවේ පෙනි සිටින ලෙසට නියෝගයක් ලබාදීමෙන් පසුවත් මුලින් දැක්වූ කරුණුවලට පටහැනිව කරුණු දක්වමින් නැවත වරක් අධිකරණයට අපහාස කිරීමට උත්සාහ දරා ඇති බව පෙනෙන්නට ඇතැයි පැවසූ ජනාධිපති නීතිඥ එම්.ඒ. සුමන්තිරන් මහතා වගඋත්තරකරු නඩු විභාගය අවසන් වනතුරු රක්ෂිත බන්ධනාගාරගත කළ යුතුව ඇතැයි ද විනිසුරු මඬුල්ලට පැවැසීය. විදේශයකදී ලැබුණු අධිකරණ නියෝග අනුව ඔහු අධිකරණය හමුවට දැඩි දුෂ්කරතා මැද හෝ පෙනී සිටියේ අධිකරණයට ගරු කරමින් වන බැවින් පෙත්සම්කාර පාර්ශ්වයේ එම ඉල්ලීමට ඉඩදීම යුක්ති සහගත නොවන බව ද ජනාධිපති නීතිඥ පායිස් මුස්තාපා මහතා විනිසුරු මඬුල්ලට පැවසීය. මෙකී ගැටලුව නිසා සංචාරක ව්‍යාපාරයට දැඩි තර්ජනයක් එල්ල වී ඇති බැවින් අධිකරණය විසින් ලබාදී ඇති නියෝගය ප්‍රකාරව කටයුතු කිරීමට නියෝගයක් කරන්නැයි සංචාරක ක්ෂේත්‍රය නියෝජනය කරමින් පෙනි සිටි නීතිඥ සුරේන් ඥානරාජ් මහතා අධිකරණයෙන් ඉල්ලා සිටියේය. මෙම අවස්ථාවේදී අධිකරණය හමුවේ පෙනි සිටි නියෝජ්‍ය ආගමන පාලක හා පරිගණක අංශයේ අධ්‍යක්ෂවරයා ඉදිරියට කැඳ වූ විනිසුරු මඬුල්ල එම දෙපාර්තමේන්තුවේ බලධාරියා ලෙස කටයුතු කළ පළමු වගඋත්තරකාර ආගමන විගමන පාලකවරයාට තම අධිකරණය විසින් ලබාදී ඇති නියෝග අනුව කටයුතු කිරීමට පියවර ගන්නා ලෙස අවශ්‍ය බලධාරීන් දැනුවත් කළ යුතුව ඇතැයි පෙන්වා දුන්හ.
මේ වනවිට නව කැබිනට් මණ්ඩලයක් පත්කර විෂය භාර නව අමාත්‍යවරයකු පත්කර ඇති බැවින් ඔවුන්ගෙන් උපදෙස් ලබා ගැනීමේ අවශ්‍යතාවයක් පවතින්නේ යැයි නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් විවේකා සිරිවර්ධන මහත්මිය විනිසුරු මඬුල්ලට පැවසූවාය. එවැනි අවශ්‍යතාවයක් ඇති බව තම අධිකරණයට නොපෙන්නේ යැයි විනිසුරු මඬුල්ල පැවසූහ. එම පෙත්සම්වල වගඋත්තරකරුවකු ලෙස නම් කොට වීඑෆ්එස් වර්ල්ඩ්වයිඩ් ඉන්ටර්නැෂනල් ලිමිටඩ් වෙනුවෙන් සුදත් පෙරේරා, ඇසෝසියේටඩ් නීතිඥ සමාගමේ උපදෙස් මත ජනාධිපති නීතිඥ නයිජල් හැච් මහතා ඇතුළු නීතිඥ මණ්ඩලයක් පෙනි සිටියහ.
එම නඩු තුන සම්බන්ධයෙන් විභාගය ලබන ජනවාරි 22වැනිදා ආරම්භ කිරීමට ද විනිසුරු මඬුල්ල වැඩිදුරටත් නියෝග කළහ.
