ශ්රී ලංකාවේ බන්ධනාගාර පද්ධතිය තුළ දරාගත නොහැකි මට්ටමේ තදබදයක් පවතින බවත්, පුද්ගලයින් 10,500ක් සඳහා පමණක් ඉඩකඩ පවතින බන්ධනාගාර තුළ මේ වන විට සිරකරුවන් 40,000ක් රඳවා සිටින බවත් හිටපු බන්ධනාගාර මාධ්ය ප්රකාශක ජගත් චන්දන වීරසිංහ මහතා අනාවරණය කරයි. උරගස්මංහන්දිය යටගල මහා විද්යාලයේදී පැවැති සම්මන්ත්රණයකදී ඔහු මේ බව සඳහන් කළේය.
බන්ධනාගාරගතව සිටින පිරිසෙන් 65%ක් සිංහල බෞද්ධයන් වන අතර, ඔවුන්ගෙන් බහුතරයක් මත්ද්රව්ය ජාවාරම් සහ මත්ද්රව්යවලට අදාළ වැරදි සම්බන්ධයෙන් අත්අඩංගුවට පත් වූවන් බව ද හෙතෙම පෙන්වා දුන්නේය. මෙම සිරකරුවන් 40,000 අතර කුඩා දරුවන් 66 දෙනෙකු සිටින බවත්, මරණ දඬුවම නියම වූ කාන්තාවන් 18 දෙනෙකු ඇතුළු සිරකරුවන් 806 දෙනෙකු සිටින බවත් ඔහු වැඩිදුරටත් කියා සිටියේය. මීට අමතරව මනුෂ්ය ඝාතන, මංකොල්ලකෑම් සහ මත්ද්රව්ය චෝදනා මත කාන්තාවන් 2,000ක් පමණ රිමාන්ඩ් බන්ධනාගාරගතව සිටිති.
බන්ධනාගාරගත වූවන්ගෙන් බහුතරයක් නූගත් හෝ අධ්යාපනයක් නොලැබූ තරුණ තරුණියන් බවත්, මත්ද්රව්ය උවදුර හේතුවෙන් උසස් රාජ්ය නිලධාරීන්ගේ දරුවන් පවා සිරගත වී සිටින බවත් වීරසිංහ මහතා මෙහිදී පැහැදිලි කළේය. සංවිධානාත්මක කල්ලිවල ගොදුරු බවට පත් නොවී දරුවන් යහමගට යොමු කිරීම සඳහා දෙමාපියන් වගකීමෙන් කටයුතු කළ යුතු බව ද ඔහු අවධාරණය කළේය. මෙම අවස්ථාවට මහා සංඝරත්නය, පොලිස් විශේෂ කාර්ය බලකායේ නිලධාරීන් සහ ප්රදේශවාසීන් විශාල පිරිසක් එක්ව සිටියහ.
