බස් රථයකදී නැතිවූ සංචාරක මඟ පෙන්වන්නෙකුට අයත් රුපියල් ලක්ෂ 15 කට අධික මුදලක් අඩංගු මුදල් පසුම්බිය ඇතුළු එහි අඩංගුව තිබූ ලිපි ලේඛන කිසිදු අඩුපාඩුවක් නොමැතිව ඔහු වෙත භාර දුන් උතුම් මිනිසකු වන ගුවන් හමුදාවේ විශ්‍රාමික බලලත් නිලධාරියකු පිළිබඳ පුවතක් කහතුඩුව පොලිසියෙන් වාර්තාවේ.
සංචාරක මඟ පෙන්වන්නෙකු ලෙස රැකියාව කරන වැලිමඩ අඹගස්දෝව පදිංචි 33 හැවිරිදි ඩි. එම්. චින්තක ප්‍රියදර්ශන දිසානායක ඉකුත් 27 වෙනිදින බොරලැස්ගමුව වේරහැර සිය සහෝදරයාගේ නිවසට ගොස් යළි පිළියන්දල කරා පැමිණීම සඳහා කොළඹ සිට හොරණ කරා ධාවනය වෙමින් තිබූ බස් රථයකට වේරහැර ප්‍රදේශයෙන් ගොඩවී තිබිණි.
බස් රථයේ අසුන්ගත් ඔහු පිළියන්දල කරා පැමිණ බස් රථයෙන් බැස ගොස් තිබූ අතර මුදල් පසුම්බිය බස් රථයේ අසුන මත අමතකව දමා ගොස් තිබිණි.
පිළියන්දල නගරයෙන් බැස ඒ පිළිබඳ සොයා බැලුවද මුදල් පසුම්බිය සොයාගැනීමට නොහැකි වීම හේතුවෙන් ඒ සම්බන්ධයෙන් පිළියන්දල පොලිසිය වෙත ගොස් මුදල් පසුම්බිය තුළ රුපියල් 19000/= මුදලක් , බැංකු 4 කට අයත් රුපියල් ලක්ෂ 15/= ක් පමණ අඩංගු පෙට් කාඩ් 4 , රුපියල් 8000/= ක පෙර ගෙවුම් කාඩ් පත් මෙන්ම රියදුරු බලපත්‍රය ඇතුළු තවත් ලිපි ලේඛන රැසක්ද එහි අඩංගුව තිබූ බව සඳහන් කරමින් පැමිණිල්ලක් ද සිදුකර තිබිණි.
අද (31) කහතුඩුව පොලිසියේ ස්ථානාධිපති ඒ එච් කේ ප්‍රියංකර මහතා හමුවට පැමිණ තිබු කහතුඩුව සන්ෆල්වර් ගාඩන්හි පදිංචි විශ්‍රාමික ගුවන් හමුදා බලලත් නිලධාරියා ඔහු බස් රථයකින් නිවස කරා පැමිණෙන අතරවාරයේදී යාබද අසුන මත මුදල් පසුම්බියක් තිබූ බවත් එය තමන් භාරයට ගත් බවත් එය හිමිකරු සොයා බාර දෙන ලෙසත් ස්ථානාධිපතිවරයාගෙන් ඉල්ලීමක් කරමින් එය ස්ථානාධිපතිවරයාගේ මේසය මත තැබුණි.
ඒ අනුව පොලිස් නිලධාරියකු කැඳවූ ස්ථානාධිපතිවරයා මුදල් පසුම්බිය පරික්ෂා කර ඒ තුළ තිබූ දුරකථන අංකයකට ඇමතුමක් ලබාගෙන එය මුදල් පසුම්බියේ හිමිකරුගේ බව තහවුරු කරගෙන අද (31) පොලිසිය වෙත ඔහු කැඳවා විශ්‍රාමික ගුවන් හමුදා බලලත් නිලධාරියා අතින්ම එකී මුදල් පසුම්බිය සංචාරක මඟ පෙන්වන්නා වෙත භාරදීමට කටයුතු සම්පාදනය කළේය .
මිනිසත්කමට නිගා දෙමින් මුදල් වලට මිනිසත්කම පාවාදෙන වර්තමානයේ ගුවන් හමුදා විශ්‍රාමික බලලත් නිලධාරී උපුල් සෙනවිරත්න මහතා වත්මන් සමාජයට කදිම ආදර්ශමත් පණිවිඩයක් ලබා දී ඇති බව කහතුඩුව පොලිසියේ ස්ථානාධිපති ප්‍රධාන පොලිස් පරීක්ෂක ඒ එච් කේ ප්‍රියංකර මහතා පැවසීය.
මෙහිදී මුදල් පසුම්බියේ හිමිකරු වූ චින්තක ප්‍රියදර්ශන දිසානායක මහතා ගුවන් හමුදාව විශ්‍රාමික බලලත් නිලධාරියාට අනේක වාරයක් එය ස්තූති පූර්වක ප්‍රණාමය පුද කරමින් ඔහුගේ දුරකථන අංකය ඉල්ලා ගැනීමට ද අමතක නොකළේය.
