මන්ත්රීවරුන් 20 දෙනෙකු සහ රජයේ නිලධාරීන් 50කට ආසන්න පිරිසකට පාතාල කල්ලිවලින් මරණීය තර්ජන එල්ල වී ඇති බව පොලිස් ආරංචි මාර්ග සඳහන් කරයි. මෙම තර්ජනයට ලක් වූ පිරිස අතර වැඩි වශයෙන් පොලිස්, බන්ධනාගාර, රේගු සහ ගුවන්තොටුපළ විමර්ශන නිලධාරීන් සිටින බව වාර්තා වේ. විදේශයන්හි සිට ක්රියාත්මක වන සංවිධානාත්මක අපරාධකරුවන් මෙරට සිටින තම කල්ලි සාමාජිකයන්ට සහාය දෙන ලෙස බල කරමින් මෙම තර්ජන සිදු කරන බව හෙළි වී ඇත.
මෙම තත්ත්වය තුළ තම ජීවිත ආරක්ෂාව තහවුරු කරන ලෙස අනුරාධපුර දිස්ත්රික් මන්ත්රී රෝහණ බණ්ඩාර මහතා පාර්ලිමේන්තුවේදී කථානායකවරයාගෙන් ඉල්ලීමක් කර තිබේ. ඔහු පවසන්නේ මුලින් තර්ජනයක් පවතින බව පැවසූ පොලිස්පතිවරයා පසුව එවැනි තර්ජනයක් නැතැයි ප්රකාශ කර ඇති බවයි. කෙසේ වෙතත්, මේ වන විටත් තර්ජන පවතින මන්ත්රීවරුන් 10 දෙනෙකුට පමණ විශේෂ ආරක්ෂාව සහ ස්වයං ආරක්ෂාව සඳහා පිස්තෝල ලබා දීමට රජය පියවර ගෙන ඇත.
අධිකරණ හා ජාතික ඒකාබද්ධතා අමාත්ය හර්ෂණ නානායක්කාර මහතා පවසන්නේ බන්ධනාගාර නිලධාරීන්ට එල්ල වන පාතාල තර්ජන සම්බන්ධයෙන් රජය දැඩි අවධානයෙන් සිටින බවයි. බන්ධනාගාර තුළ සිටින අපරාධකරුවන්ට වරප්රසාද ලබා දෙන ලෙස බල කරමින් ලැබී ඇති තර්ජනාත්මක හඬ පට කිහිපයක් ද අමාත්යවරයා වෙත භාර දී ඇත. පාතාලය මුලිනුපුටා දැමීමට වත්මන් රජය කැප වී සිටින බවත්, නිලධාරීන්ගේ ආරක්ෂාව වෙනුවෙන් උපරිම ක්රියාමාර්ග ගන්නා බවත් අමාත්යවරයා වැඩිදුරටත් අවධාරණය කළේය.
