මහගම, තිරිවානකැටියවත්ත ප්රදේශයේ ලැයිම් කාමරයක් තුළ මියගොස් සිටි 76 හැවිරිදි පෙරුමාල් ලෙච්චමී නමැති කාන්තාවගේ මරණය ඝාතනයක් බව පශ්චාත් මරණ පරීක්ෂණයේදී අනාවරණය වී තිබේ. කළුතර නාගොඩ ශික්ෂණ රෝහලේ අධිකරණ වෛද්ය නිලධාරිවරයා විසින් නිකුත් කරන ලද වාර්තාවට අනුව, මෙම මරණය හිස්කබලට සහ මස්තිෂ්කයට එල්ල වූ තදබල පහරදීමක් හේතුවෙන් සිදු වූවක් බව අගලවත්ත පොලිසිය තහවුරු කළේය.
ඉකුත් 31 වැනිදා රාත්රියේ සිය ලැයිම් කාමරයේ මුළුතැන්ගෙයි වැටී සිටියදී ඇයගේ සිරුර සොයාගත් අතර, හිස පිටුපස කිසියම් තද මතුපිටක වැදී ඇති බවත් මුහුණට බරැති ආයුධයකින් පහර දී ඇති බවත් වෛද්ය වාර්තා පෙන්වා දෙයි. මෙම සිද්ධිය සම්බන්ධයෙන් අගලවත්ත පොලිස් ස්ථානාධිපතිවරයාගේ මෙහෙයවීම යටතේ විශේෂ පරීක්ෂණයක් ආරම්භ කර ඇති අතර, ඝාතනයට සම්බන්ධ සැකකරුවන් හඳුනාගැනීම සඳහා ප්රදේශවාසීන්ගෙන් ප්රකාශ ලබා ගනිමින් පවතී.
