සතොස ආයතනය හරහා ආනයනය කරන ලද කැරම් බෝඩ් 14,000ක් සහ දාම් බෝඩ් 11,000ක් 2015 ජනාධිපතිවරණ සමයේ නීතිවිරෝධි ලෙස ක්‍රීඩා සංගම් අතර බෙදාහැරීමෙ වරදට හිටපු අමාත්‍යවරුන් වන මහින්දානන්ද අලුත්ගමගේ සහ නලින් ප්‍රනාන්දුට එරෙහි නඩුවේ තීන්දුව කොළඹ මහාධිකරණය ඊයේ ප්‍රකාශයට පත් කෙරුණා.
ඒ අනුව බන්ධනාගාර මාධ්‍ය ප්‍රකාශක ගාමිණි බී. දිසානායක මහතා පවසා සිටියේ ඔවුන් දෙදෙනාට සිරකරුවන්ට අන්දවන “ජම්පරය” අන්දවා ඇති බවත් නිදාගැනීම සඳහා පැදුරක් සහ කොට්ටයක් ලබාදී ඇති බවයි.
වැලිකඩ බන්ධනාගාරයේ සාමාන්‍ය සිරකරුවන් රඳවා සිටින පොදු වාට්ටුවකට ඇතුළත් කර තිබෙන බවටත් වාර්තා පළ වනවා.
මේ අතර අද දිනයේදී ඔවුන්ට බන්ධනාගාරය තුළ වැඩ නියම කිරීමට නියමිත අතර බොහෝ විට ඔවුන් දෙදෙනාම වැලිකඩ බන්ධනාගාරයේ මුද්‍රණ අංශයේ සේවයේ යොදවනු ඇතැයි වාර්තා වෙයි.
