අවමගුල අද සවස
අභාවප්‍රාප්ත ප්‍රවීණ ගායන ශිල්පී ප්‍රියා සූරියසේන මහතාගේ දේහය ඊයේ (26දා) පස්වරුවේ ශ්‍රී ලංකා ගුවන්විදුලි සංස්ථා පරිශ්‍රයට රැගෙන එනු ලැබීය.
එහිදී ශ්‍රී ලංකා ගුවන්විදුලි සංස්ථාවේ සභාපති ආචාර්ය උදිත ගයාෂාන් ගුණසේකර මහතා ඇතුළු කාර්ය මණ්ඩලය විසින් දේහය පිළිගනු ලැබූ අතර මෙම අවස්ථාවට සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස, සෞඛ්‍ය හා ජනමාධ්‍ය නියෝජ්‍ය අමාත්‍ය වෛද්‍ය හංසක විජේමුණි යන මහත්වරුන් ප්‍රමුඛ ගුවන්විදුලි සංස්ථාවේ කාර්ය මණ්ඩලය, ප්‍රියා සූරියසේන මහතාගේ පවුලේ ඥාතීන් ඇතුළු කලාකරුවෝ රාශියක් එක්වූහ.
සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා ඇතුළු පිරිස ශ්‍රී ලංකා ගුවන්විදුලි සංස්ථා පරිශ්‍රයේදී දේහයට අවසන් ගෞරව දක්වන අයුරු ඡායාරූපයේ දැක්වේ. ඒ මහතාගේ දේහය පිළිබඳ අවසන් කටයුතු අද (27දා) සවස බොරැල්ල කනත්තේදී සිදුකිරීමට නියමිතය. එතෙක් දේහය ජයරත්න රෙස්පෙක්ට් හි තැන්පත් කර තැබෙනු ඇත.
