අමෙරිකාව සහ ඉරානය අතර සති දෙකක සටන් විරාමයක් ප්රකාශයට පත් කර ඇති පසුබිමක, මැදපෙරදිග යුද්ධය පෙන්වමින් මෙරට ඉහළ දැමූ ඉන්ධන මිල වහාම අඩු කර ජනතාවට සහන සලසන ලෙස විපක්ෂ නායක සජිත් ප්රේමදාස මහතා රජයට බලකර සිටියි. මැදපෙරදිග කලාපයේ පවතින යුදමය වාතාවරණය සහ හෝමුස් සමුද්ර සන්ධියේ අවහිරතා පෙන්වමින් රජය විසින් ඉකුත් මාර්තු මාසයේ සිට ඉන්ධන මිල 25% කින් පමණ ඉහළ දැමූ බවත්, ඉන් ජනතාව දැඩි පීඩනයකට පත්ව සිටින බවත් ඔහු පෙන්වා දෙයි. ලෝක වෙළඳපොලේ තෙල් මිල තාවකාලිකව ස්ථාවර වන මෙම සටන් විරාම කවුළුව (Ceasefire window) භාවිතා කරමින්, ජනතාව මත පටවා ඇති අධික බදු බර ඉවත් කිරීමට රජය වහාම පියවර ගත යුතු බව විපක්ෂ නායකවරයා අවධාරණය කරයි.
විශේෂයෙන්ම ජනාධිපති අනුර කුමාර දිසානායක මහතා ප්රමුඛ රජය මැතිවරණ සමයේදී පොරොන්දු වූ පරිදි ගොඩබෑමේ පිරිවැයට (Landing cost) ඉන්ධන ලබා දෙන බව පැවසුවද, දැනට පවතින මිල ගණන් දෙස බැලීමේදී රජය තවමත් අධික බදු අය කරමින් සිටින බව ඔහු පවසයි. ඉන්දියාව වැනි රටවල් පවා තම ජනතාවට සහන සැලසීම සඳහා ඉන්ධන බදු අඩු කර ඇති පසුබිමක, ශ්රී ලංකාව තුළ එවැනි වැඩපිළිවෙලක් ක්රියාත්මක නොවීම කනගාටුවට කරුණක් බවත්, තෙල් මිල ඉහළ යාම නිසා ප්රවාහන හා ආහාර මිල ගණන් දරාගත නොහැකි ලෙස ඉහළ ගොස් ඇති බවත් සජිත් ප්රේමදාස මහතා පෙන්වා දෙයි. පවතින සටන් විරාමය හුදෙක් රාජ්ය තාන්ත්රික පුවතක් පමණක් කර නොගෙන, එහි සැබෑ සහනය මෙරට පාරිභෝගිකයාට ලබා දීමට රජය කටයුතු කළ යුතු බවට ඔහු වැඩිදුරටත් අදහස් දක්වා ඇත.
