ඉරානයේ ප්රබලතම හමුදා සහ ආර්ථික ඒකකය වන ඉස්ලාමීය විප්ලවීය ආරක්ෂක බලකාය (IRGC) ත්රස්තවාදී සංවිධානයක් ලෙස නම් කිරීමට යුරෝපා සංගමය (EU) ඊයේ (29) ඒකමතිකව තීරණය කළේය. යුරෝපා සංගමයේ විදේශ ප්රතිපත්ති ප්රධානී කාජා කලාස් (Kaja Kallas) මහත්මිය ප්රකාශ කළේ, සිය දහස් ගණනින් සිය වැසියන් ඝාතනය කරන ඕනෑම පාලන තන්ත්රයක් සිය අවසානය කරා ගමන් කරන බවයි. මෑත කාලීනව ඉරානය තුළ පැවති මහජන උද්ඝෝෂණ මර්දනය කිරීමේදී 6,000කට අධික පිරිසක් ඝාතනය කිරීමට මෙම බලකාය වගකිව යුතු බවට එල්ල වන චෝදනා මෙම තීරණයට ප්රධාන හේතුව වී තිබේ.
මෙම පියවරත් සමඟ IRGC සංවිධානය අල්-කයිඩා සහ ISIS වැනි ත්රස්ත කල්ලි පවතින ලැයිස්තුවටම ඇතුළත් කෙරෙන අතර, එහි වත්කම් තහනම් කිරීම සහ යුරෝපය තුළ සියලු මූල්ය ගනුදෙනු නතර කිරීම වැනි දැඩි නීතිමය ක්රියාමාර්ග ක්රියාත්මක වනු ඇත. මීට පෙර ඇමරිකාව, කැනඩාව සහ ඕස්ට්රේලියාව ද මෙම බලකාය ත්රස්ත සංවිධානයක් ලෙස නම් කර තිබුණි. යුරෝපා සංගමයේ මෙම තීරණය ඇමරිකාවේ “උපරිම පීඩනය යෙදීමේ” (Maximum Pressure) උපායමාර්ගයට ලැබුණු විශාල සහයෝගයක් ලෙස විදේශ විශ්ලේෂකයෝ පෙන්වා දෙති.
ඉරානයේ දැඩි විරෝධය සහ “උපායමාර්ගික වැරැද්ද”
ඉරාන විදේශ අමාත්ය අබ්බාස් අරග්චි (Abbas Araghchi) මෙම තීරණය දැඩි ලෙස හෙළා දකිමින් ප්රකාශ කළේ මෙය යුරෝපය විසින් සිදුකළ “මහා උපායමාර්ගික වැරැද්දක්” බවයි. යුරෝපා සංගමය කලාපීය ආතතිය සමනය කිරීමට උත්සාහ කරනවා වෙනුවට ඇමරිකාවේ වුවමනාවන් මත “ගින්නට පිදුරු දමමින්” සිටින බවට ද ඔහු චෝදනා කළේය. ඉරාන සන්නද්ධ බලකායන්ගේ සාමාන්ය මාණ්ඩලික මණ්ඩලය නිවේදනයක් නිකුත් කරමින් කියා සිටියේ, මෙම “වගකීම් විරහිත” ක්රියාවට එරෙහිව ඉරානය සිය ස්වෛරීභාවය ආරක්ෂා කර ගැනීමට අවශ්ය ඕනෑම පියවරක් ගැනීමට සූදානම් බවයි.
