දිට්වා සුළිකුණාටුවේ බලපෑම හමුවේ වුවද ශ්රී ලංකාවේ ආර්ථිකය යහපත් මූල්ය විනයකින් යුතුව පවත්වාගෙන යන බව මහ බැංකු අධිපති ආචාර්ය නන්දලාල් වීරසිංහ මහතා පවසයි. කොළඹදී අද (06) පැවති සමුළුවක් අමතමින් ඔහු කියා සිටියේ, මීට පෙර රජයේ බැංකුවල පැවති රුපියල් ට්රිලියනයක හිඟය මේ වන විට රුපියල් ට්රිලියනයක අතිරික්තයක් දක්වා වර්ධනය වී ඇති බවයි.
මෙම මූල්ය අතිරික්තය හේතුවෙන් ආපදා තත්ත්වයන් හමුවේ වුවද රජයට අලුතින් ණය ගැනීමට සිදු නොවූ බව පෙන්වා දුන් අධිපතිවරයා, මේ වසරේදී අමෙරිකානු ඩොලර් බිලියන 8ක ආරක්ෂිත සංචිතයක් ගොඩනැගීමට අපේක්ෂා කරන බවද සඳහන් කළේය. දැනට 2%ක මට්ටමේ පවතින උද්ධමනය 5% සීමාව ඉක්මවා යාමට ඉඩ නොදී පවත්වා ගැනීම මහ බැංකුවේ මීළඟ ඉලක්කයයි.
ආර්ථිකය යළි කඩා වැටෙනු ඇතැයි පවසන පාර්ශවවල විවේචනවලට පිළිතුරු දෙමින් ඔහු අවධාරණය කළේ, 2025 වසරේදී ඩොලර් මිලියන 3,934ක ණය වාරික ගෙවා අවසන් කර ඇති බවයි. ඇතැම් පිරිස් පවසන පරිදි ස්වෙච්ඡාවෙන්ම ණය පැහැර හැරීමට කටයුතු කළහොත් ජාත්යන්තර ආයෝජකයින් රට කෙරෙහි තැබූ විශ්වාසය බිඳ වැටෙන බවත්, එවැනි ප්රකාශ හරහා ආර්ථිකය යළි අගාධයකට ඇද දැමීමට ඇතැමුන් උත්සාහ කරන බවත් මහ බැංකු අධිපතිවරයා වැඩිදුරටත් හෙළිදරව් කළේය.
