අවලාද හා අපහස මධ්‍යයේ විවිධ අභියෝගවලට මුහුණදෙමින් දුෂ්කර මාවතක් ඔස්සේ ආණ්ඩුව සියලූ කැපකිරීම් කර ඉදිරියට පැමිණියේ රටේ තරුණ තරුණියන්ගේ අනාගතය සුරක්‍ෂිත කර දීම සඳහා බව අග්‍රාමාත්‍ය රනිල් වික්‍රමසිංහ මහතා පවසයි.
අග්‍රාමාත්‍යවරයා මේ බව පැවසුවේ පසුගිය 30 වනදා වැනිදා හම්බන්තොට, වීරවිල පැවැති ජාතික යොවුන් පුරය සමාප්ති උළෙලේදීය.
අතීතයේ ශ්‍රී ලංකාවට පිටුපසින් සිටි රටවල් වර්තමානය වන විට සංවර්ධනවී ඉදිරියට පැමිණ තිබෙන බවත් ඒ තත්වය වෙනස් කොට මින් මතු වෙනත් රටකට අපව පසුකොට ඉදිරියට යෑමට ඉඩ නොතබන බවත් අග්‍රාමාත්‍යවරයා පැවසීය.
දස වැනි යොවුන් පුරය වීරවිල පශු සම්පත් භූමියේ පැවැති අතර, ඊට රටේ සියලුම දිස්ත්‍රික් නියෝජනය කරමින් තරුණ තරුණියෝ 8000 ක් පමණ පැමිණ සිටියහ.
29 සහ 30 යන දිනවල අග්‍රාමාත්‍ය රනිල් වික්‍රමසිංහ මහතා දිස්ත්‍රික් මට්ටමින් පිහිටුවා ඇති යොවුන් කඳවුරුවලට ගොස් තරුණ තරුණියන්ගේ ක්‍රියාකාරකම් පිළිබඳව සොයා බලමින් ඔවුන් සමඟ සුහඳ හා මිත්‍රශීලීව කටයුතු කිරීම බොහෝදෙනෙක්ගේ පැසසුමට ලක් විය.
ජාතික යොවුන් පුරය සමාප්ති උළෙල අමතා තවදුරටත් අදහස් දැක්වූ රනිල් වික්‍රමසිංහ මහතා මෙසේ ද කීය.
” චෝදනාවන්ට ලක්වෙමින්, විවේචන භාර ගනිමින්, මඩ ගැසීම්, පරාජය ආදියට මුහුණ දෙමින් අප ඉදිරියට පැමිණියා. ඔබට අනාගතයක් නිර්මාණය කිරීමට නම් බිය නැතිව ජනතාවට නිවැරදි දේ පවසමින් නිවැරදි මාර්ගයේ ගමන් කළ යුතුව තිබුණා. අප දියුණු වන්නේ ඒ ආකාරයට පමණක් බව අප එදා අවබෝධ කර ගත්තා. එක් මොහොතක හෝ අප ගෙන ආ වැඩසටහන් නතර කළා නම් අද මෙම ප්‍රතිඵල ලැබෙන්නේ නැහැ. අපට අවශ්‍ය ඔබේ අනාගතය ආරක්‍ෂා කරමින් ඉදිරියට යාමයි.
ඒ වෙනුවෙන් අප සියලූ දෙනා එකට එකතු විය යුතුයි. තරුණ ඔබ සවිබල ගැන්විය යුතුයි. අපේ අයවැය හරහා තරුණ ප්‍රජාව සවිබල ගැන්වීම වෙනුවෙන් එන්ටර්ප්‍රයිස් ශ්‍රී ලංකා වැඩසටහනේ ඔබට ණය ලබා දීමට කටයුතු කර තිබෙනවා. අප්‍රේල් මස 05 වනදා අය වැය සම්මත වන විට එම ණය සහන ඔබට ලබා දීම අපි ආරම්භ කරනවා. තරුණ සේවා සභාව, යෞවන සමාජ හරහා ණය ඉල්ලීම පිළිබඳව ඔබව දැනුම්වත් කරනවා. ඒ සඳහා රජයේ බැංකු, මුදල් අමාත්‍යංශය වගේ අමාත්‍යංශයේ ස්වයං රැකියා ඒකකය ආදී සියලූ ආයතන එකට එක්වෙනවා. එම ණය පහසුකම් ඔබට මැයි මාසයේ සිට භුක්තිවිඳීමට අවස්ථාව සලසා දෙනවා.
තරුණ කමේ අදහස් මතු වෙන ස්ථානය මෙයයි මෙය අප ඉදිරියට ගෙන යමු. මින් පසු වෙනත් රටකට දෙවැනි නොවීමටත් අපේ තරුණ පරපුර වෙනුවෙන් හොඳ අනාගතයක් නිර්මාණය කිරීමටත් සුරක්‍ෂිත සැප පහසු ජීවිතයක් ඇති කර ගැනීමටත් අප තීරණය කර ගත යුතුයි. එම වැඩසටහන ඉදිරියට ගෙන යාම ඔබට භාර දෙන බව මම අවසාන වශයෙන් ප්‍රකාශ කරනවා. යැයි අග්‍රාමාත්‍යවරයා වැඩිදුරටත් කියා සිටියේය.
මෙම අවස්ථාවට එක්සත් ජාතික පක්‍ෂයේ නියෝජ්‍ය නායක හා නිවාස, ඉදිකිරීම් සහ සංස්කෘතික කටයුතු අමාත්‍ය සජිත් ප්‍රේමදාස, අග්‍රාමාත්‍ය කාර්ය මණ්ඩල ප්‍රධානී, වරාය හා නාවික කටයුතු සහ දක්‍ෂිණ සංවර්ධන අමාත්‍ය සාගල රත්නායක, ධීවර හා ජලජ සම්පත් සංවර්ධන රාජ්‍ය අමාත්‍ය දිලිප් වෙදආරච්චි, දකුණු පළාත් සභා විපක්‍ෂනායක එස්. තෙන්නකෝන් නිලමේ, තරුණ සේවා සභාවේ සභාපති එරන්ද වැලිඅංගේ, යුද හමුදාපති ලූතිනන් ජනරාල් මහේෂ් සේනානායක යන මහත්වරුන් ප්‍රමුඛ දේශපාලනඥයින් හා රාජ්‍ය නිලධාරීන් විශාල පිරිසක් සහභාගිවී සිටියහ.
