ශ්රී ලංකාව සහ ඉන්දියාව සම සත්කාරකත්වය දරන 10 වන පන්දුවාර 20 ක්රිකට් ලෝක කුසලාන තරගාවලියේ නිල ජය සංකේතය (Trophy) අද (21) මෙරටට රැගෙන ඒමට නියමිතව තිබේ.
ජනාධිපති අනුර කුමාර දිසානායක මහතාගේ ප්රධානත්වයෙන් මෙම කුසලානය පිළිගැනීමේ සහ මහජන ප්රදර්ශනය සඳහා වන ජාතික සංචාරය නිල වශයෙන් දියත් කිරීමට සියලු කටයුතු සූදානම් කර ඇති බව ශ්රී ලංකා ක්රිකට් ආයතනය පවසයි.
ඒ අනුව අද සිට ලබන 24 වැනිදා දක්වා කොළඹ, මහනුවර, දඹුල්ල සහ යාපනය යන ප්රධාන නගර කේන්ද්ර කර ගනිමින් ලෝක කුසලානය ප්රදර්ශනය කිරීමට නියමිත අතර, මෙය ක්රීඩාලෝලීන්ට ලෝක කුසලානය සමීපයෙන් දැකබලා ගැනීමට ලැබෙන සුවිශේෂී අවස්ථාවකි.
ලබන පෙබරවාරි 07 වැනිදා ආරම්භ වන මෙම දැවැන්ත ක්රිකට් සැණකෙළිය සඳහා රටවල් 20ක් සහභාගී වන අතර මුළු තරග 55ක් ඉන්දියාවේ සහ ශ්රී ලංකාවේ ක්රීඩාංගණ 8කදී පැවැත්වීමට සැලසුම් කර ඇත.
ශ්රී ලංකාවේ කොළඹ ආර්. ප්රේමදාස, එස්.එස්.සී. සහ පල්ලෙකැලේ යන ක්රීඩාංගණවලදී තරග 20කට අධික සංඛ්යාවක් පැවැත්වෙන අතර, ශ්රී ලංකාව සහභාගී වන පළමු තරගය පෙබරවාරි 08 වැනිදා අයර්ලන්තයට එරෙහිව කොළඹදී පැවැත්වේ.
විශේෂයෙන්ම පාකිස්ථාන කණ්ඩායම සහභාගී වන සියලුම තරග සහ ඉන්දියාව හා පාකිස්ථානය අතර පැවැත්වෙන තීරණාත්මක තරගය ද ශ්රී ලංකාවේදී පැවැත්වීමට නියමිත වීම මෙරට ක්රිකට් ප්රේක්ෂකයින්ගේ දැඩි උද්යෝගයට හේතු වී තිබේ.
