සබරගමුව මහ සමන් දේවාලයේ සිදුකළ විගනණයකින් හෙළි වූ තොරතුරු මත ඇත් දළ ජෝඩු දෙකක් අස්ථානගත වීම ඇතුළු කරුණු හතරක් සම්බන්ධව නියෝජ්‍ය බෞද්ධ කටයුතු කොමසාරිස් රත්නපුර පොලිසියට පැමිණිල්ලක් සිදුකර ඇත.
සබරගමුව මහ සමන් දේවාලයේ 2024.12.1 දින සිදුකළ විගණනයකින් අඩි 4කට වඩා දිගැති ඇත් දළ ජෝඩු දෙකක් අස්ථානගත වීම ඇතුළු දේවාලයේ රන්, රිදී, මුතු, මැණික් තැන්පත් කර ඇති සේප්පු දෙකේ යතුරු අස්ථානගතවීම, වාර්ෂික හා අර්ධ වාර්ෂික ආදායම් වියදම් වාර්තා නිසි ලෙස ඉදිරිපත් නොකිරීම, දේවාලය සතු නින්දගම් ඉඩම්වල පතල් කැපීම සඳහා ඉඩම් බදු දීම හා බලපත්‍ර ලබා දීම සම්බන්ධව නිසි ලිපි ගොනුවක් පවත්වා නොගැනීම යන කරුණු හතරක් සම්බන්ධව බෞද්ධ කටයුතු කොමසාරිස් ජනරාල්වරයා විසින් 2025.01.20 දිනැති ලිඛිත නියෝගයකට අනුව 1931 අංක 19 දරන විහාර දේවාල ආඥා පනත යටතේ අංක 32 වගන්තියට ප්‍රාකාරව රත්නපුර නියෝජ්‍ය බෞද්ධ කටයුතු කොමසාරිස්වරයා විසින් රත්නපුර පොලිසියේ විශේෂ බරපතළ වංචා දූෂණ විමර්ශන අංශයට ඉකුත් 20 වන දින පස්වරු 5.00ට පමණ මෙම පැමිණිල්ල කර ඇත.
1931 අංක 19 දරන විහාර දේවාල ආඥා පනතේ නිසි බලධරයා ලෙස කටයුතු කරන බෞද්ධ කටුයුතු ජනරාල් කොමසාරිස්වරයා විසින් එවා තිබූ ලිපියකට අනුව රත්නපුර නියෝජ්‍ය බෞද්ධ කටයුතු කොමසාරිස්වරයා විසින් සිදුකළ මෙම පැමිණිල්ලට අනුව රත්නපුර පොලිසියේ විශේෂ බරපතළ වංචා දූෂණ විමර්ශන අංශය මගින් පරීක්ෂණ ආරම්භ කර ඇති අතර ඒ අනුව හිටපු බස්නායක නිලමේවරයාගෙන් ප්‍රකාශයක් සටහන්කර ගැනීමට නියමිතය.
අවස්ථා දෙකකදී පැවති පසුගිය රජය මගින් හිටපු බස්නායක නිලමේවරයාගේ ධූර කාලය දීර්ඝ කිරීමට කටයුතු කර තිබුණත් වත්මන් රජය මගින් 2024.12.31 වන දිනෙන් හිටපු බස්නායක නිලමේවරයාගේ ධූර කාලය අවසන් කර වැඩ බැලීම සඳහා භාරකාර නිලමේවරයෙකු පත්කිරීමට කටයුතු කෙරිණි.
මේ වන විට බෞද්ධ කටයුතු කොමසාරිස් ජනරාල්වරයා විසින් ඉදිරි වසර පහේ ධූර කාලය සඳහා නව බස්නායක නිලමේවරයෙකු තෝරා පත්කිරීමේ නිලවරණය 2025.02.11 වන දින පැවැත්වීමට කටයුතු සූදානම් කර ඇති අතර එම නිලවරණය සඳහා මෙවැනි ප්‍රබල චරිත රැසක් ඉදිරිපත් වීමට සූදානම් වන බවට ද තොරතුරු ලැබී ඇත.
මේ සම්බන්ධව හිටපු බස්නායක නිලමේවරයා වන මිගාර ජයසුන්දර බණ්ඩාරගෙන් විමසීමක් කළ අතර ඒ සම්බන්ධව ඔහු මෙසේ පැවැසීය.
“ඔය කියන ඇත් දළ තිබෙන දේවාලයේ ඇතුල්කට්ටුවේ උඩ හඳුන්කූඩුව තිබෙන ස්ථානයේ යතුරු භාරව සිටින්නේ කපු මහත්වරු. ඉදිරියෙන් පොලිස් මුරපොළ පිහිටා තිබෙනවා. එහි අවශ්‍ය ආරක්ෂාවත් තිබෙනවා. ඇත් දළ නැතිවීම සම්බන්ධව මම දන්නේ නෑ. අර්ධ වාර්ෂික වාර්තා සියල්ල බෞද්ධ කටයුතු දෙපාර්තමේන්තුවට යවා තිබෙනවා. සේප්පු දෙකේ යතුරුත් මට භාර දී නෑ. මගේ පාලන කාලය තුළ ඔය කියන සේප්පු විවෘත කර නෑ.”
